Eń birinshi jumaqqa kiretin áıel

Bir kúni ardaqty Muhammed Paıǵambarymyzdyń (s.ǵ.s.) qyzy Fatıma ákesinen suraıdy:
- Áketaı! Dúnıe júzinde eń birinshi jumaqqa kiretin kim?
- Anaý tómengi aýylda, pálen úıde turatyn bir kisi bar. Birinshi jumaqqa kiretin sol.

Hazreti Fatıma bul kisini kórýge qumartady. Aıtqan úıge baryp, esikti qaǵady. Arǵy jaqta qartaıǵan bir áıel kisiniń daýysy shyǵady:
- Bul kim eken?
- Men ǵoı, Fatıma. Hazreti Paıǵambardyń qyzy Fatıma.

Endi álgi daýystiń qınalyp, abyrjyp shyqqany baıqalady:
- Aınalaıyn, qyzym! Sen renjimeshi! Biraq otaǵasynyń ruqsaty bolmasa, seni úıge kirgize almaımyn. Men búgin ruqsat surap qoıaıyn. Sen erteń kele alasyń ba?

Bul Fatıma úshin kútpegen jaǵdaı edi. Alǵashqyda sasyp qalady. Biraq keri qaıtyp ketedi. Erteńine álgi qaqpany taǵy baryp urady. Qasyna súıikti uldary Hasan men Hýseındi ertip alady. Álgi áıel taǵy da jón suraıdy:
- Bul kim, qasyńdaǵy kimder?
- Bul men ǵoı, Fatıma. Qasymdaǵy balalarym.
- Janym, Fatıma, aıypqa buıyrmashy. Men kúıeýimnen tek sen úshin ruqsat surap edim. Balalaryń keletinin bilmedim ǵoı. Taǵy da erteń kelesiń be? Ruqsat alyp qoıaıyn.

Fatıma keri qaıtady. Kún ótken saıyn tań qalysy artyp jatyr. Ertesine taǵy keledi.
- Bul kim?
- Fatıma.

Sol kezde esik ashylady. Mine, qyzyq, kesheden beri daýysyna qarap, úlken apa shyǵar dep júrgeni jap-jas, áp-ádemi kelinshek eken. Fatıma tań qalyp suraıdy:
- Menimen sóılesip júrgen apa qaıda?
Álgi áıel aýyzyndaǵy tasty shyǵaryp alyp tastady da: «Ol men ǵoı.» - dedi.
- Urtyńyzǵa nege tas salyp alǵansyz?
- Joldan ári-beri ótýshiler bolyp qalyp, meniń sebebimnen kúnáli bolyp qalmasyn degen nıetim edi.

Mine, jumaqqa alǵash kiretin áıel osyndaı bolǵan eken. Osy oqıǵadan úlgi alýymyz kerek-aq. Kúıeýine sonshalyqty adal, dindar áıel. Sondaı-aq áıel kisiniń daýsynyń ózi keıde adamdy kúnáǵa batyryp qoıýy yqtımal.

Asylbek ÁÝEZHANULY