«EL BOLYP BIRIGÝDEN ASQAN BAQYT JOQ»
Zamanynda alyp qaǵanat quryp, jarty álemge bıligin júrgizgen áıgili Bilge qaǵannyń ózi osylaı artyna sóz qaldyrǵan eken. Eldiń muńy, jerdiń qamy úshin «túnde uıyqtamaı, kúndiz otyrmaı» kúresken bahadúr babamyzdyń baqyt dep basqany emes, birlikti aıtýy kóp oı salady. Sol kezdegi tarydaı shashyraǵan kóshpendilerdiń basyn biriktirip, bir týdyń astyna jınaǵan bilikti basshy bul sózdi ómirdiń ózeginen syǵyp shyǵarǵandaı kórinedi. Rasynda da, memleket qansha myqty, tegeýrindi bolǵanymen, ishki birlik pen qoǵam yntymaǵy bolmasa, ydyraýǵa ushyraıtyny anyq emes pe?!
... Búgin memleket basshysy Qasym-Jomart Kemelulynyń joldaýyn tyńdaı otyryp, osy bir qanatty sóz oıymda taǵy bir jańǵyrdy. El áleýetin arttyrýǵa kóptegen baǵyt-baǵdarlamalardy qozǵaı kele Memleket basshysy: «Qoǵamdaǵy birlik pen kelisimdi kózdiń qarashyǵyndaı saqtaýymyz kerek. Etnosaralyq jáne konfessııaaralyq qatynastyń qanshalyqty mańyzdy ekenin barlyq azamatymyz túsiný qajet. Biz qashanda alaýyzdyqqa qarsy tura bilgen elmiz. Adamdy tiline, ultyna násiline qarap kemsitýge, bireýdiń namysyna tııýge jol bermeımiz, zań boıynsha jaýapqa tartamyz. Konstıtýtsııaǵa qaıshy mundaı jaýapsyz qadamdar elimizdiń negizgi múddelerine zııan keltiredi», – dep atap ótti.
Iıa, búginde júzden astam ult ókili men ulysty baýyryna basqan bizdiń elimizde aýyzbirshilik pen yntymaqtyń quny óte joǵary bolýy kerek. «Altaý ala bolsa, aýyzdaǵy ketetinin» ejelden eskergen babalarymyzdyń birlik bolmaıynsha, tirlik te ónbeıtinin kesip aıtqan. Qanshama alyp ımperııalar men tasy órge domalaǵan memleketterdiń kóbine syrtqy jaýdan emes, ishten shyqqan iritkiden ydyrap, búlikten qulap jatqanyn qart tarıhtyń betterinen anyq kórýge bolady.
«Adamzattyń bárin súı baýyrym dep» jyrlaǵan Abaı atamyzdyń da aıtpaǵy – osy el birligi, qoǵam arasyndaǵy yntymaq pen meıirimdilikti molaıta túsý bolatyn. «Bolar eldiń balasy birin-biri batyr deıdi» demekshi, ananyń ulty bólek, mynanyń dini basqa demesten, ortaq Otanymyz – Qazaqstannyń keleshegi jolynda birlikpen, birimizge degen baýyrmaldyqpen, jaqyn tartar janashyrlyqpen qarym-qatynas jasar bolsaq, Bilge qaǵannyń ózi armandaǵan baqytqa qol jetkizbeımiz be?! Alla ózi elimizge jar bolǵaı!
Erbolat Júsipov
Nur-Sultan qalasynyń Bas ımamy
