DINI SANA
Dinı sana, dinı tájirıbe, dinı sezim, dinı is-áreket sııaqty uǵymdar qazirgi qoǵamda jıi talqylanady. Dinı sana qoǵamdyq sana formalarynyń ishindegi eń mańyzdylarynyń biri sanalady. Onyń anyqtamasy retinde adamnyń belgili bir dinı ıdeıalar men qundylyqtardy moıyndaýy, ustanýy, sanasynda kórinis tabýy dep tujyrymdaýǵa bolady. Adamnyń aınalasyndaǵy qoǵamdyq baılanystar, otbasy, dinı tulǵalar, ómirde basynan keshirgen jaǵdaıattary t.b. dinı sananyń qalyptasýyndaǵy negizgi faktorlar. Sapalyq turǵydan ratsıonaldy nemese Emotsıonaldy túrde dinı sananyń kórinisteri baıqalady. Qazirgi bizdiń qoǵamdaǵy keıbir dinı taqyryptardaǵy talas-tartystar barysynda da osy dinı sananyń deńgeıi men kórinisterin baıqap jatamyz.
Dindegi dindarlyq, taqýalyq, Allaǵa jaqyndyq sııaqty qundylyqtardy maqsat etý barysynda adamdardyń dinı sanasynda ártúrli ustanymdar jaryqqa shyǵyp otyrady. Qysqasy dinı senim bostandyǵy berilgen qoǵamda dinı sananyń qalyptasýy, kórinis berýi qalypty qubylys. Degenmen, dinı sana deńgeıin qalaı kóterýge bolady degen suraqqa bir jaqty jaýap bere almaıtyn shyǵarmyz. Máselen, elimizde dinı atrıbýttarǵa, dinı ǵımarattarǵa, ustanymdarǵa qatysty daý bolǵan kezde dinı sana deńgeıi mańyzdy sanalady. Qazirde kóbinese Emotsııamen qabyldaıtyn toptar men azamattar basymdyq tanytyp jatyr. Árıne, dinı tájirıbeniń alǵashqy kezeńinde bul máselege de túsinistikpen qaraýǵa bolar. Alaıda qoǵamdaǵy dinı sana deńgeıi qalyptasatyn bolsa kóptegen talasty máseleler sheshimin tabar edi deýge bolady. Bir ǵana mekteptegi oramal máselesiniń osynshalyqty daý týdyrýy da osy sananyń tómendiginen bolyp otyr.
Dindarlar qoǵamdaǵy barlyq máselelerge dinniń shablonymen qarasa, dinnen tys kózqarastaǵylar din dese tura qashar qalypta tur. Oramal taqqan qyz oramal taqpaǵan qyzǵa sen kúnákarsyń, Allanyń paryzyn oryndamaısyń, bolmasa ásire siltep kápirsiń dese, oramal taqpaǵan qyz kerisinshe sen radıkalsyń, Ekstremıstsiń dese bul másele jaqyn bolashaqta sheshimin tappaq emes. Munyń sheshimi qoǵamdaǵy áralýandyqty barlyq tarap moıyndap, qabyldaı bilý qajet. Qoǵamdaǵy barlyq adamdar dindar bolmaıtyny sııaqty, dinsiz de bolmaıdy. Olaı bolsa, ortaq múdde negizinde túsinistik ornata bilý jetilgen dinı sananyń kórinisi bolmaq.
