DINDI JIBERÝShI – ALLA TAǴALA

Alla Taǵala adamdy Ózin tanyp, qulshylyq etý úshin jaratqandyqtan din jiberdi. Bul dinniń negizi «Taýhıd» (Allanyń birligi) seniminen turady. Islam dinine deıin Alla óziniń shynaıy, dara jolyn úıretý úshin árbir qaýymǵa, taıpaǵa, ultqa elshiler arqyly din jiberdi. Uly Jaratýshynyń bar ekendigine sengenimen, qalaı qulshylyq etý kerektigin adam aqylymen sheshe almaıdy. Sol úshin dinı ámir men tyıymdar kelip otyrdy. Ekinshiden adamǵa din kelmese o dúnıede Allaǵa:

«Ýaqytynda Seniń elshileriń kelgende, shynaıy joldy úıretkenińde biz tozaqqa barmas edik. Ia, Alla! Ádildigiń qaıda?!» degendeı ýáj aıtary sózsiz. Mine, osyndaı syltaý men jeleýge birden-bir tosqaýyl retinde árbir qaýymǵa jeke-jeke elshi men sharıǵat zańy jiberildi. Quranda bul jaıynda bylaı deıdi:

«Burynǵy paıǵambarlardan keıingi adamdarǵa (paıǵambar kelse biz táýbe eter edik dep) syltaý aıtpaýy úshin jaqsy habar jetkizýshi, (astamshylyq etkenderdi) eskertýshi etip, taǵy da paıǵambarlar jiberdik.  Alla asa ústem, hıkmet ıesi» (4. «Nısa» súresi, 165-aıat).

 Elshi kelmegen, din jiberilmegen eshbir qaýymnyń bolmaǵandyǵyn myna aıattar habar beredi: «Shyndyǵynda Biz seni aqıqatpen (mýmınderge) qýanyshty habar jetkizýshi, (kápirlerdi) qorqytýshy  etip jiberdik. Qaýymdardyń qaısysyna bolsa da elshi jiberilgen» (35. «Fatyr» súresi, 24-aıat); «Árbir úmmettiń bir paıǵambary bar» (10. «Iýnýs» súresi, 47-aıat). 

Alla qaısy bir qaýymǵa paıǵambar men sharıǵat jibermese, onda ol qaýymdy aqyrette jazalamaıdy. Óıtkeni, Alla Ózin tanytatyn elshi men dinı úkimder jibermegendikten, adamdar Allaǵa qalaı qulshylyq etý kerektigin aqylymen sheshe almaı, qulshylyq jasaımyn dep, Allaǵa serik qosý nemese kúpirlik etip qoıýy ábden múmkin edi. Sol sebepti Quranda: «Paıǵambar jibermeıinshe eshkimdi jazalamaımyz» (17. «Isra» súresi, 15-aıat) dep anyq eskertilgen.

Demek, Uly Jaratýshy óziniń dinı sharıǵatyn jibere otyryp, ony ıslammen támamdaǵan. Al ıslamnan keıin qııametke deıin eshqandaı ıláhı din kelmeıtini ámbege aıan.