DINDE ShEKTEN ShYQPAÝ TÝRALY
Senim máselesine qatysty «Tanym tunyǵy» kitabyndaǵy aqıdalyq máseleler jáne onyń túsindirmelerinen úzindi usynyp otyrmyz.
«Islam – shekten shyǵýshylyq pen naqystyqtan, (ıláhı sıpattardy) uqsatý men joqqa shyǵarýdan, taǵdyrdy májbúrlik dep kórý men ony moıyndamaýdan, Allanyń jazasynan qaýipsizbin dep esepteý men rahymynan túńilýshilikten ada orta jol».
Túsindirmesi:
Alla Taǵalanyń dini ártúri aıyptardan, aýytqýshylyqtardan ada, ońǵa da, solǵa da bura tartpaıtyn týra jol. Jaratqan ıemizdi jaratylystarǵa uqsatpaımyz, Onyń sıpattaryn teriske shyǵarmaımyz. Qudaıdyń qaharynan qutyldyq dep eseptemeımiz ári rahymynan maqurym qaldyq dep túńilmeımiz.
«Mine, osy – bizdiń dinimiz ári syrtqy jáne ishki tanymymyz. Biz osy aıtyp ótken, baıandaǵan nárselerge qarsy keletin adamdarǵa múlde qatysymyz joq ekendigimizdi bildirip, Allaǵa qaıyrylamyz. Alla Taǵaladan ımanymyzdy berik qylyp, san alýan áýeıi qııaldan, túrli pikirlerden, mýshábbıha, mýǵtazıla, jáhmııa, jábrııa, qadarııa jáne Súnnet pen jamaǵat jurtyna qarsy kelip, adasýǵa beıim júretin basqa da teris aǵymdardan aýlaq qylýyn suraımyz. Bizdiń olarǵa esh qatysymyz joq. Bizdiń pikirimizde olar adasqandar, keri ketkender».
Túsindirmesi:
Bizdiń dinimiz, ustanǵan tanymdyq jolymyz osy. Atalǵan ustanymdarǵa qarsy shyqqandarǵa esh qatysymyz joq. Alla Taǵalanyń sıpattaryn jaratylystyq qasıetterge uqsatatyn mýshábbıha sııaqty, sol sıpattardy joqqa shyǵaratyn mýǵtazıla sııaqty, ıláhı sıpattardy teristeıtin jáhmııa sııaqty, pendede erik joq, ol bárin isteýge májbúr etilgen deıtin jábrııa sııaqty, pende óz isin ózi jaratady deıtin qadarııa sııaqty adasýshy toptardan aýlaqpyz.
Alladan týra joldan aınytpaýyn tileımiz.
«Tanym tunyǵy» kitabynan
