"BÚIIRIŃDI TAIaNBA"

Úlkenderdiń aýzynan estiletin bul tyıymnyń sebebin kópshiligimiz bile bermeımiz. Áıteýir "jaman bolady" deı salamyz. Taratyp túsindiretinder neken-saıaq.

Ol bylaı:

Bir shańyraqtyń adamy qaıtys bolǵanda marqumnyń jaqyndary qımastyqpen egilip jylaıdy. Óksip jylaıdy. Solqyldap jylaıdy. Daýys salyp, joqtap jylaıdy. Bul - tabıǵı jaǵdaı, óıtkeni qýraı synǵan joq, ómirden adam ótti. Endigi jerde ony qaıtyp kórmeısiń, únin estimeısiń. Kimge bolsa da ata-anadan, baýyr-týystan aıyrylý ońaı emes. Osyndaı aýyr sátte egilip-ezilip jylap otyrǵandardyń ishki aǵzasyna ádettegiden kóp salmaq túsedi. Búırek pen baýyr, ókpeniń baýlary sozylyp, júrek jıi qaǵyp, ót qabynyp, asqazan qabysyp degendeı...

Sondyqtan qaraly úıdiń adamdarynyń belin myqtap býady. Belin oraı býǵan soń onyń ishki qurylysy bos qozǵalmaıdy, eki ıini túsip búkshımeıdi, adamnyń ıyǵy kóteriledi. Nege deseńiz, beli býylǵan jerge, ıaǵnı myqyn tusyna eki barmaqty eki jaǵynan suǵyp, búıirdi taıanyp otyrǵanda adamnyń eńsesi tikteledi, denege súıeý bolady. Muny úıdegi joqtaý aıtýshy áıelder isteıdi. Búıirin taıaný - amalsyzdan, qazanyń ústinde qara jamylyp otyrǵanda qajettilikten basqa túsetin jaǵdaı. Sondyqtan jaıshylyqta jamandyq shaqyrý, ólim tileý nyshanyndaı bolǵandyqtan qatal tyıym sanalǵan.

Zeınep Ahmetova "Kúretamyr"