BÚGINGI TÁŃIRShILDIK – BÚLDIRGI TÁŃIRShILDIK!
![](/img/articles/2a08c3a39dc42a59a42827f788a23e1d.jpg)
Adam ǵaleıhıssalamnan búginge deıingi adamzattyń ómir-tarıhy eń alǵash qaı kezde bastalyp, qalaı jalǵasqanyn bir qudaıdan basqa eshkim anyq bilmeıdi. Abaısha aıtqanda, «kez-kezimen nábı kelgen» ár dáýirdiń dini – sol dáýirdiń dini. Aqıdasy ózgermeıtin, úmbeti «Alladan basqa táńir joqtan» ózge sózge ermeıtin táýhıdtik tanym, durys dinniń bári aqıqat ilimi, bári Bir Jaratýshynyń dini bolatyn. Al Alla bergen aqyly sol nyǵmettiń naq ıesin qabyldaýǵa jetpegen jandarǵa qaıran qalasyń keıde.
Táýelsizdik alyp, asyl dinimiz ıslammen qaıta qaýyshqanymyz sol edi, táńirshildik degen «moda» shyqty. Ras bul da – bir zamandardaǵy arǵy, tym kónedegi babalar nanymy. Alaıda, aqıqat ilimdi burynǵylar áıteýir at shaldyryp ótkendikten emes, aqıqat bolǵandyǵy úshin qabyldasaq kerek emes pe?!.. Bir Táńirge tabynǵan túrkiler óz tanymymen qabysqannan keıin, aqylyna qonǵan soń baryp Alla dinine aıqara qushaq ashqan ǵoı!.. Shynyna kelgende, táńirshildiktiń qazaqqa tipti qatysy shamaly, tarıh kýá, bizdiń halyq – "qazaq" atanǵaly musylman!
Árıne, Táńirshildikti tym kónedegi (Qazaq handyǵynan áldeqaıda buryndaǵy) tarıhymyzdyń bir bólshegi retinde tanyp-bilý úshin zerttep-zerdeleý aıyp emes te shyǵar. Biraq, menińshe, ýaqytynda óz mindetin ótegen, al qazir elshisi emeski, enshisi kómeski, sharıǵaty hattalmaǵan, qaǵıdat-qıraǵaty saqtalmaǵan, kitaby joq, kúmándi tusy kóp, kúni ótken nanym-senimdi din retinde jańǵyrtýǵa tyrysý, qaradúrsin mysalmen aıtqanda, «Lexuspen» zýlap júrgen zamandastardy qyr astynda qalǵan ǵasyrdyń qyrqynshy jyldary shyqqan «Pobeda» máshınesine nemese esek arbaǵa qaıta minýge shaqyrý sııaqty ápende áreket, tyrash tirlik qoı!
Tańǵala otyryp taǵy bir túıgenim – «táńirshildikti» jalaýlatatyndardyń kóbisi ózin de, ózgeni de aldap júrgen, shyndyǵynda haqqa ıman keltirmegen dinsizder ekeni. Onyń serkeleriniń birimen – «Qazaq Táńir dinine qaıta kelýge tıis» dep qol jınap, qara kóbeıtip, qaralaı qudaı urǵan, ataǵynan at úrketin ǵalym aǵamyzben kezinde birge qyzmet istegenimiz bar. Marqum, obaly ne kerek, qazaqty shyn súıetin edi. Biraq, Allam aıasyn, daýasyz ateıst hám táýbasyz táńirshil bolyp ótti ómirden. Sondaı táńirshil aǵalarymyzben, óz qatarlastarymyzdyń birazymen tanyspyz, sálemimiz túzý, syılaspyz, syrt sypaıymyz. Ashyq alakóz aǵaıyndarymyz da bar arasynda. Qalaı bolǵanda da, ózara ynty-shyntysyz, rııasyz aralas-quralas bolý qıyn bolyp turǵany ótirik emes, bir ókinishtisi.
Qysqasy, búgingi táńirshildik – fıtná, ıaǵnı búldirgi táńirshildik. Ar jaǵynan qudaısyzdyqtyń qulaǵy qyltıyp turǵan bul «táńirshildik» – «Qazaqtyń óz ulttyq dini bar, basqasy kerek emes» degen syńaıdaǵy qasa nadandyq pen qyńyrlyqtan, ımansyzdyq pen shovınızmniń shalyǵynan basqa eshteńe de emes!
Paıǵambar (s.ǵ.s.) «arab pen arab emes adamnyń bir-birinen taqýalyǵynan basqa eshbir qasıetimen artyqshylyǵy joq» ekenin anyq-qanyq aıtqan ǵoı. Óresiz bolsań, óziń óle súıgen adamyńa, ultyńa ólsheýsiz zııan tıgizýiń op-ońaı, jaqsy nıetpen de jamandyq jasap, jik salýǵa bolatynyn eskere bermeımiz-aý osy. Barsha adamzatqa ortaq aqıqatty ala-bóle bólshektep, haqty «arabtyń dini», «qazaqtyń dini», «shúrshittiń dini» dep qıdalap, qaralaı qıǵash tartqan qyrttyqty qoıý kerek-aq bizge. Ol qısynǵa salsaq, astaǵfıralla, dúnıede qansha ult bolsa, sonsha Qudaı bar bolyp shyqpaı ma? Onsyz da bútinimizdiń ózi jetpis úsh jikke bólinip, bir Islamnyń tóńireginde qyryq pyshaq bolǵan qazaqty aıaıyq, baýyrlar. Aıdyń-kúnniń amanynda, din-musylmannyń zamanynda adaspaıyq, aǵaıyn!