Bıyl oraza ustamaımyn...
Rasynda, oraza – ımandy synaıtyn uly qulshylyq eken. Bıylǵy shilińgir shildeniń ystyǵy da ımandy shaıqaltqan syńaıly.
Bizdiń aıtaıyn degenimiz basqa bolatyn. Somalıde turatyn bir musylmannyń jazǵan haty haqynda edi. Saýd Arabııasynyń sheıh-ǵalymy Efırde kórermender suraǵyna jaýap berip jatady. Baǵdarlama qonaǵyna saýal joldaǵan Somalı musylmany bylaı deıdi: «Sáresi men aýyzasharda jeıtin eshteńe joq. Mundaı kezde oraza ustaýǵa bola ma?» Buǵan jaýap bere almaı, kóńili bosaǵan sheıh kóz jasyna erik beripti (sýretti qarańyz).
Keıde aldymyzǵa as-sýymyz ýaqytyly kelmeı qalsa, sabyr, tózim, shúkir degen adamı qasıetterdi «shetke ysyryp» qoıamyz. Al Afrıkadaǵy asharshylyqty oılasaq, qazirgi jaǵdaıymyzǵa qarap, shúkir aıtpaýǵa «shara» joq.
Qazir meshitterde jomart jandardyń demeýshiligimen kún saıyn 500-600 adamǵa deıin aýyzashar berilip keledi. Aýyzashar berýshiler kóp. Biraq ıftar uıymdastyratyn bos kún joq. Qandaı ǵanıbet! Qudaıǵa shúkir, molshylyq zaman ǵoı. Tym bolmaǵanda kúndelikti tiske basar birdeńe tabylady. Oǵan da táýba deımiz.
Al endi «tamaq qymbat, ashpyn» dep qońyrqaı tirshiligimiz úshin artyq aýyz sóz aıtyp, «oraza ustamaımyn» deýimiz uıat-aý. Nápaqamyz birine jetip, birine jetpeı jatsa, ol da Allaǵa shynaıy shúkirshilik aıtýǵa turatyn taǵdyr emes pe? Denimiz saý, bala-shaǵa aman, aıaq-qolymyz bútin degendeı... Izgi adamdar basyna synaq kelgende: «Budan da jamany bolar edi ǵoı», – dep ózin jubatady eken. Buǵan da saýap jazylmaq.
Paıǵambarymyz Muhammed (Allanyń oǵan salaýaty men sálemi bolsyn): «Múminniń isi qandaı ǵajap! Rasynda onyń barlyq amaly qaıyrly. Bul – múminnen basqaǵa buıyrmaǵan baqyt. Eger onyń basynda qýanysh bolsa, Allaǵa shúkir etedi. Sol úshin saýap-syıǵa keneledi. Eger oǵan bir synaq kelse, oǵan sabyr etedi. Oǵan da saýap alady. Allanyń musylmanǵa jazǵan árbir taǵdyry qaıyrly», – depti.
Ramazannyń bitýine de sanaýly kúnder qaldy. Qasıeti men qadiri mol aımen qol bulǵap, qoshtasqaly turmyz.
Ramazan – ıgi isterimiz ben shalys basqan qadamdarymyzǵa, pendelikpen jasaǵan qate-kemshilikterimizge esep beretin beıne bir beles aıy eken. Ramazan – ómirlik jospar quratyn mejeli maýsym. Ramazan – rýhanı jańarý kezeńi.
Ramazan – patsha men paqyrdy, baı men muqtaj adamdy teńestiretin teńdik aıy. Ramazan – aǵaıyn arasyn jaqyndastyra túsetin birlik aıy. Ramazan – medrese aıy. Ramazan – pendeniń keýdesine tálim men taǵylym, taqýalyq pen ıman, meıirim quıylatyn qulshylyq aıy. Ramazan – qos dúnıeniń baqyt kilti – Quran aıy. Osylaı jalǵastyra berýge bolady.
Moral oqyp ketti demeńiz. Bizdiki – dinnen bir nasıhat aıtý ǵoı. Qashan da qaıyrly, izgi isterimiz qabyl bolǵaı!
Aǵabek QONARBAIULY,
QMDB Baspasóz bóliminiń meńgerýshisi
