Birlik – bereke bastaýy
1 mamyr – Qazaqstan halqynyń birligi kúni. Bul mereke Qazaqstan Respýblıkasynyń azamaty, Qazaqstan halqy assambleıasynyń múshesi, dinı salada 30 jyldan astam qyzmet etip kele jatqan men úshin óte mańyzdy.
Biz qandaı jetistikke jetsek de birligimizdiń arqasynda qol jetkizdik. Dostyq pen yntymaq, tatýlyq pen birlik syndy qundylyqtar barsha qazaqstandyq azamat úshin asa mańyzdy ıgilikke aınaldy. Prezıdentimiz Qasym-Jomart Toqaev aıtqandaı, beıbitshilik pen qoǵamdyq kelisim – baǵa jetpes baılyǵymyz. Bizdiń birligimiz bekem, maqsatymyz ortaq, rýhymyz asqaq. Sonyń arqasynda kez kelgen qıyndyqty jeńip, damýdyń dańǵyl jolynda kelemiz.
Bıylǵy Qazaqstan halqynyń birligi kúni merekesi erekshe sátke sáıkes kelip otyr. Birinshiden, qasıetti Ramazan aıyna sáıkes kelse, ekinshiden búgin qasıetti juma. Juma – musylmannyń duǵasy qabyl bolatyn kún.
Qazaqastan musylmandary dinı basqarmasynyń tóraǵasy, Bas múftıimiz Naýryzbaı qajy Taǵanuly búgin, 1 mamyr – Qazaqstan halqynyń birligi kúni merekesimen jalpy qaýymdy quttyqtaýynda: «Allanyń qalaýymen bıyl orazany oqshaýlaný jaǵdaıynda qarsy alyp, birlik merekesin úıde atap ótýge týra keldi. Elimizde tótenshe jaǵdaıdyń jarııalanýy – asa qajetti ýaqytta qabyldanǵan sheshim. Bul halyqtyń densaýlyǵy men ómirin saqtaý jolyndaǵy ıgi qadam der edik. Endigi maqsat – birligimizdi tanytyp, karantın talaptaryn saqtap, juqpaly dertpen jumyla kúresý», – dep atap ótti.
Rasynda, Bas múftı atap ótkendeı, qoǵamnyń damý jolynda halyqtyń birligi qashan da qymbat qundylyq bolǵan. Álemdi jaılaǵan búgingi syndarly sátte onyń mańyzdylyǵy odan saıyn arta túsýde. Birliktiń arqasynda juqpaly dertti joıǵan eldi kórip otyrmyz.
«Islam dini barsha ultty tatýlyqta, ózara qurmet pen kelisim aıasynda ómir súrýge úndeıdi. Jaratýshy Jabbar Iemiz qasıetti Quranda adamzat balasyna: «Allanyń jibinen myqtap ustańdar, ajyrap bólinbeńder» («Álı-Imran» súresi, 103-aıat), – dep buıyrǵan. Dana halqymyz «Yrys aldy – yntymaq» deıdi. Birligi bekem elge bereke ornaıdy. Jaratqannyń járdemimen yntymaqtyń arqasynda osy synaqty de eńseremiz degen úmittemiz», – dep atap ótken Bas múftıdiń tilegi men batasy qabyl bolsyn degimiz keledi.
Dinaralyq jáne ultaralyq túsinistik – Islam dininiń negizgi jolynyń biri. Alla taǵala Quran Kárimde «Sizderdi biz bir atadan, bir anadan jarattyq, bir-birińmen tanysyp, bilisý úshin túrli ulttarǵa, rýlarǵa bóldik» deıdi. Barsha musylman bir-birine týys, baýyr. Sonymen qatar, kórshimen jáne basqa da dindegilermen ózara qarym-qatynas sııaqty máselelerdiń jol-jobasy bizge belgilenip berilgen.
Qasıetti kitabymyz Quranda birlik týraly kóp jerde baıandalǵan. Sońǵy Paıǵambarymyz Muhammedtiń (oǵan Allanyń salaýaty men sálemi bolsyn) hadısterinde de adamzattyń aýyzbirshiligi ýaǵyzdalǵan. Alla Taǵala «Álı Imran» súresinde: «...Bólinbeńder», – dep buıyrǵan.
Ardaqty Paıǵambarymyz Muhammed (Allanyń oǵan salaýaty men sálemi bolsyn): «...Kópshilikpen birge bolyńdar! Bólinýden saqtanyńdar», – dep ósıet etken. Din ǵulamalary qashan da barsha adam balasyn meıirimdilikke, ortaq maqsatqa úndegen. Qazaqstan musylmandary dinı basqarmasy da óz kezeginde jamaǵatty árkez birlikke shaqyryp, jaqsylyqqa úndep keledi.
Maıqy bıdiń: «Altaý ala bolsa, aýyzdaǵy ketedi, tórteý túgel bolsa, tóbedegi keledi», – degen sózinde úlken mán bar. Qazaqstan Respýblıkasynyń Tuńǵysh Prezıdenti – Elbasy Nursultan Nazarbaev aıtqandaı, birlik – baǵa jetpes baılyǵymyz. Turaqtylyq – bizdiń tatýlyǵymyz berik bolýy úshin taban tireıtin tuǵyrymyz.
Alla Taǵala el qamynda júrgen barsha azamattarǵa qýat, densaýlyq berip, halqymyzdy jáne elimizdi aldyńǵy qatarly elderdiń qataryna qosylýǵa násip etsin.
Elimizdegi juqpaly indet tez joıylyp, mereke kúnderde basqosýdy jazsyn! 1 mamyr – Qazaqstan halqynyń birligi merekesi qutty bolsyn!
Búgingi qasıetti jumada aıtylǵan barsha duǵa-tilek qabyl bolsyn! Ámın!
Jaqııa qajy ISMAILOV,
Nur-Sultan qalasyndaǵy «Yryskeldi qajy»
meshitiniń Bas ımamy
