BES AÝYZ SÓZ

Bir: Allanyń jibergen ár synaǵyna shúkir et! Eń bastysy deniń, aıaq-qolyń saý. Ómir bir-aq ret beriledi, al múmkindik kóp. Táýbeńe kelip júr,táýbeshil pendesin qudaı da súıedi!

Ótip jatqan ómirińe nalyma, shúkir et! Senen de qıyn jaǵdaıda ólim men ómir arasynda arpalysyp, jansaqtaý bóliminde qansha jan qınalyp, dál osy sátte qıylyp ketip jatqany qansha? Ár atqan tańyńa táýbe, batqan kúnińe shúkir de. Ol ǵajapty kóre almaı júrgen zaǵıptar qanshama?!.

Eki: Aınalańa súısine, tamsana qaraılaı júr.Osy tirshilikke ǵashyq bolyp ǵumyr kesh. Bul jalǵan ýaqytsha ǵana. Kókirek kerip tepsine berme. Qandaı myqty bolsań da, kókiregińdi kór topyraqtyń zili basatynyn umytpa!

Bul bes-aq kún - jalǵan ómir! Ózgemen «alysyp» júrgende óz baqytyń men ýaqytyńdy ótkizip alasyń. «Sharshadym!», deme. Ol – kúpirlik! «Sharshaǵandy kórseteıin, bilmeı júr ekensiń!»,- dep, beınetińdi eseleı berse ne isteı alasyń!..

Úsh: Basyńdy qandaı bult shalsa da «tyrs etpe». Qudaıdyń degeni, Allanyń peshenege jazǵany bar, qashyp qutyla almaısyń! Jylanyp, jala jaýyp, jaýlasa berme, bári kókte jazýly tur! Shyr aınaldyryp ákelip ózińniń basyńa bir kúni barlyq jaqsylyqty úıip-tógip bere salady, nemese qalyń sordy!

Júrekti de, janyńdy da tynyshtandyr, alasurma, jantalaspa! Eshkimniń naqaq kóz jasy men nalasyn arqalama. Jalǵyzdyń únin Qudaı ǵana estıdi, «Men jalǵyzbyn!»,- dep qamyqpa!

Tórt: Jamandyqqa jaqsylyqpen jaýap ber. Kektenip, óshpendilikpen ómir súrý óz týǵan perzentterińniń tamyryn óz qolyńmen shapqanmen teń!

Óz sátsizdigiń men baqytsyzdyǵyńdy ózgeden kórme, ózińnen izde! Jasaǵan jaqsylyǵyń keı pendelerden jamandyqpen qaıtady. Oǵan sen daıyn bol!

Bes: Úlken jaqsylyq pen baılyq kelerde Alla seni aıamaı synaqqa salady... Tózimiń men shúkirińniń salmaǵyn baıqaıdy. Aspannan alpys túrli pále jaýsa da Qudaıdan úmitińdi úzbe!

Pende... Pendeler adasady, shatasady, uryssady, qyrylady... Aqyr sońynda ózgege ne qyldy?! Sony ózderi arqalap qaıtady. Qudaısyz qýraı da synbaıdy, qar da jaýmaıdy. Endeshe aýyrdy da jeńildi de kótere bil!