Batam baǵaly bolsyn deseńiz...

Dana halqymyz ejelden-aq «Batamenen el kógerer» dep, appaq peıil-nıetpen Alladan suraǵan dýaly duǵa, aq bata men jaqsy tilektiń jaqsylyqqa sep bolyp, Jaratýshynyń rahymyna jetkizetinin tereń túsingen. Sodan  da bolar, jasy úlkenniń batasyn alý halqymyzdyń saltyna sińisip, ıgi dástúrge aınalyp ketken. Rasynda, úlkenderdiń batasyn, eldiń alǵysyn alǵannan asqan abyroı  joq desek qatelespegen bolarmyz.

Alaıda, qazirgi tańda osy batanyń sıqy qalaı bolyp tur?

Keıde aqsaqaldarǵa bata berińiz dep qol jaısańyz, uıalatyn nemese qashqaqtaıtyn qarttardy kóresiz. Bata ornyna tilek aıtyp ketetinderi de kezdesip jatady. Bulardy bir jaqqa qoıǵanda, batagóı aqsaqaldarymyzdyń ózi uzaq aıtamyn dep shatasyp jatady. Keıde óleńdetip aıtamyn dep umytyp qalyp jatsa, endi biri tili kelmese de arabsha aıtamyn dep jastarǵa kúlki bolyp ta jatady.

Birde meshitte bir aqsaqal bata beremin dep sonshalyqty uzaq aıtyp, arabsha-qazaqshasyn aralastaryp, sońynda bir aıtqan sózin qaıta qaıtalap jatyr edi, janyndaǵy ekinshi aqsaqal jaıyp turǵan qolyn túsirip, teris burylyp ketti. Batanyń sıqy qashty degen osy bolsa kerek.

Bul másele sharıǵat boıynsha qalaı deseńiz, Paıǵambarymyzdyń (s.ǵ.s.) ózi uzaq duǵa jasaǵandyǵy joq eken. Tipti, túrli toptardan birikken dushpan Mádına qalasyn qorshaýǵa alǵanda (qatty qıynshylyq ýaqytta) eki qolyn kókke sozyp: «Qurandy túsirgen, esebi jyldam Alla! Bulttardy kóshirgen, toptardy kúıretken Alla! Bulardy da jeńiliske ushyrat, teńseltip jiber»[1] dep duǵa jasaǵan eken.

Quran duǵalarynyń ózi eki-úsh sóılemnen ǵana turady.  Mysaly, «Rabbymyz bizderge dúnıede jaqsylyq ber, aqyrette de jaqsylyq ber jáne tozaqtyń otynan saqta»[2] dep duǵa jasaýdy úıretken. Bata berilgende osy úlgige saı, dóp basyp, naqty aıtylsa ári qysqa bolsa eshkim de jalyqpas edi. Bata da qadirli kúıinde turar edi. Erdiń qunyn eki-aq aýyz sózge syıdyrǵan halyqtyń búgingi urpaǵyna jarasymdy qasıet osy emes pe?!