BAQYTTYŃ BASTAÝY – SÚNNETKE BOISUNÝ

Imam Rabbanı (q.s.) hattarynyń birinde bylaı deıdi:

Alla taǵala bizge jáne biz sııaqty taqyrǵa otyrǵan dármensizderge burynǵylar men keıingilerdiń myrzasy Paıǵambarymyzǵa (s.a.ý.) erý jáne onyń jolynda bolý baqytyn buıyrtsyn.

Súnnetpen az ǵana amal etý búkil dúnıe lázzattary men barlyq o dúnıelik nyǵmetterden artyq. Naǵyz izgilik Onyń (s.a.ý.) súnnetin oryndaý arqyly qolǵa túsedi. Basty maqsat – Onyń (s.a.ý.) sharıǵatyn ustaný. Mysaly, Alla Elshisiniń (s.a.ý.) súnnetimen amal etý (jáne túnde namazǵa turýdy jeńildetý) nıetimen kúndiz qaılýla jasaý, súnnetke qaıshy atqarylǵan myńdaǵan túngi qulshylyqtan jaqsyraq. Sonymen qatar, bir adamnyń Alla taǵalanyń buıryǵy dep, azǵantaı nárseni Alla jolynda jumsaýy, taýdaı altyndy óz qalaýymen sadaqa etýden abzalyraq.

Bir kúni tań namazyn oqyp bolǵan soń Omar (r.a.) jamaǵatqa burylyp, otyrǵandarǵa nazaryn saldy. Jamaǵattyń ishinen bir adamdy izdep, taba almaǵan soń sol jerdegilerden onyń qaıda ekenin surady. Ishterinen bireýi: «Ol túni boıy ǵıbadat jasaıdy, qazir uıyqtap jatqan bolar», - dedi. Sonda Omar (r.a.): «Átteń, onyń túnimen uıyqtap, tań namazyn jamaǵatpen oqyǵany ózine jaqsyraq bolar edi» -dep jaýap qatty.

Týra joldan adasqandar kóp «rııazat» jasap, sansyz «mújahada» qylsa da, olardyń bul amaldary túkke turǵysyz. Óıtkeni, olardyń bul isteri haq dinge sáıkes kelmegendikten, olar Allanyń aldynda masqara bolady.

Eger kisiniń amaly dinge saı bolsa, (onyń bul amaly) Alla taǵalanyń razylyǵyna jetkizedi. Eger dinge qaıshy bolsa, Allanyń razylyǵynan aıyrady. Al Allanyń razylyǵynan aıyratyn istiń nátıjesi saýap emes, azap bolady.

Baqyttyń bastaýy, negizi – súnnetpen júrý. Al barsha buzaqylyq pen jamandyq ataýlynyń túbi – súnnetke qarsy turý. Alla taǵala sizge de, bizge de súnnetpen amal etýdi násip etsin. Ámın.

(Máktýbat shárıfá, 1-tom, 114-hat)