BÁLE ME, JAZA MA?
Ázireti Álıden (r.a.):
– Basymyzǵa kelgender synaq pa, jaza ma? – dep surapty.
Sonda Álı:
– Eger Jaratqanǵa jaqyndatsa – synaq, al Alladan alystatsa – bále, – dep jaýap beripti.
Demek, adamnyń basyna keletin problemalardyń sıpaty adamnyń qabyldaýyna qaraı ózgeredi eken. Qabyldaýynyń túri de adamnyń sıpatyn ózgertedi eken.
Imam Ǵazalı problemany úsh túrli qabyldaıtyn adamnyń úsh tıpin aıtady.
1. Problemany “jaza” dep qabyldaıtyndar. Bundaı tıptegi adamdarda ekijúzdiliktiń belgisi bar. Bylaısha aıtqanda, “Qudaı-aý, ne jazdym saǵan?!” – dep Qudaıdyń ózin kinálap shyǵatyndar.
2. Problemany “kúnálarymnyń keshirimi” dep qabyldaıtyndar. Mundaılar múmındik sıpattaǵy jandar.
3. Problemany “rýhanı asqaqtaýǵa jeteleıtin baspaldaq” dep qabyldaıtyndar. Bular – Allanyń has quldary degen sóz.
Endeshe, problemanyń ózin durys qabyldaý – quldyqtyń sıpaty men sapasyna áser etedi eken. Sondyqtan da, jylannyń basyna aq quıyp shyǵarǵanyńdaı, problemany da kórkem qarsy alýyń – taqýalyǵyńnan.
