ÁÝLIE BOLÝ OŃAI MA?
Aǵaly-inili eki kisi bolypty. Ekeýiniń de boıynda taqýalyǵy men qosa áýlıeligi de bar eken.
Olardyń bireýi myna zamanda qalada turyp, kóp kúnáǵa batqansha eshkim joq dalada júrip kúná ataýlydan alystaý bolaıyn dep taýdy mekendep, mal baǵyp tirshiligin jalǵastyrady. Kóńildi kirletip, júrekti qaraıtar haram joq jerde namazyn da qaza qylmaı, qulshylyǵyn da ýaqtymen jasapty.
Ekinshisi qalanyń qaq ortasynan etik jamaıtyn dúńgirshek ashyp, etikshilikpen aınalysa bastapty. Bir kúni taýdaǵy inisi aǵasynyń hal-jaǵdaıyn bilip qaıtpaq bolyp qalaǵa bet alady. Aǵasyna qoıdyń sútinen dorbaǵa quıyp ala kelýdi de umytpapty. Suraı-suraı qaladaǵy aǵasynyń jumys ornyn da taýypty. Dorbadaǵy sútin (áýlıe emes pe) qabyrǵaǵa ile salyp, ekeýara áńgimege kirisipti. Dál sol mezet bir áıel kelip etigin jóndetpek bolsa kerek. Áıel etigin sheshkende, ashyq baltyry kórinip qalady. Aǵasy eshteńege de mán bermesten aıaqkıimniń jóndeýge keletinin aıtyp, iske kirisip ketipti. Áıel aıaqkıimin sheshken kúıi biraz otyryp, jumysy bitken soń óz jónimen kete barypty. Taýda júrgende óńi túgil túsine de kirmeıtin bundaı nárseni kórgende qonaq bolyp kelgen inisiniń oıy buzyla bastasa kerek. Dál sol mezet onyń ákelgen dorbadaǵy súti de tamshylap qoıa beripti. Bunyń bárin sezip-bilip otyrǵan aǵasy sonda inisine synaı qaraǵan kúıi sóz bastapty:
– Elden qashyp, taý basynda áýlıelik qýý – árıne, ońaı is. Alaıda qaınaǵan halyqtyń tap ortasynda otyryp ózińdi kúná ataýlydan qorǵaı bilý – ol úlken syn. Mine, gáptiń bári osynda. Ekeýiniń aıyrmashylyǵyn endi uqqan bolarsyń? Biraq inisi buǵan ılana qoımastan, ózine qarsy daý aıtypty:
– Bálkim, sen kúnálardy sezinýden qalǵan shyǵarsyń?
– Eger men kúnány sezinýden qalyp, buzylǵan bolsam, onda beri qara, – depti de, aǵasy ornynan turyp áli tamshylap turǵan dorbadaǵy súttiń tesigin saýsaǵymen sál ǵana sıpaǵanda, sút tamshylaýyn sap tyıypty. Sonda ǵana aǵasynyń aıtqanyn sózsiz moıyndaǵan inisi:
– Aıtqanyńyzdyń bári ras, – depti, – naǵyz áýlıelik – taýǵa qashyp ózińdi haram men kúnálardan qorǵaý emes, naǵyz áýlıelik – ózińiz aıtqandaı qaınaǵan halyqtyń arasynda júrip dindarlyqty ustana bilýde eken...
Akikat.kz
