ATALARDYŃ AITQAN SÓZI

Aqyn Narmanbettiń atasy Baıjomartqa Balqash óńirine kóship, mal bitipti. Ony Shyńǵystaýdaǵy Qunanbaı estip:

- Baıjomarttyń mal bitetin sıqy joq edi,- depti.

Sonda anasy Zere:

- Balam, olaı deme, yrysty kelin túsken shyǵar, nesibeli bala týǵan shyǵar,- depti.

Sonda Qunekeń: - Aıttym da, qaıttym, táýbá qudaı,- degen eken.

***

Aqyn Ilııas Máńki ulynyń ákesi Máńki Qaraǵandynyń janyndaǵy Nura jerinde ótken ǵasyrda týyp - ósken. "Balasy bardyń..." degen sózinde Máńki batyr:

Alty balasy bardyń aýlyna bar ma,

Bes balasy bardyń betine kelme,

Tórt balasy bardyń tórde orny bar,

Úsh balasy bardyń aldynda aıdaǵan maly bar,

Eki balasy bardyń ókpe, baýyr, jaly bar,

Jalǵyz balasy bardyń shyǵar - shyqpas jany bar"- depti...

***

"Bárinen sóz bastaý qıyn, taýyp aıtsań mereke qylady, tappaı aıtsań

keleke qylady"- dep, sózdi bıik qoıǵan orta júz qypshaq Dosbol datqa ózi ósken Ulytaýdaǵy Jylandydan Syrǵa kóshipti. Datqanyń maly ketip,

qartaıǵanyń estip Ulytaýdyń ıgi jaqsylary jolǵa shyǵypty. Sol kezdiń dástúrimen bireýi "sóıles qyl" – dep daýystapty.

Datqa shyǵyp:

-Shirenbeı, myrzam, úıge tús.

Shirengeniń maǵan kúsh,

Azyn- aýlaq kóje bar,

Oınap, kúlip. bólip ish,

Tússeńder - mynaý qara lashyq,

Túspeseńder anaý- jolyń ashyq,- deıdi, sonda kelgenderdiń ishinen bireýi:

Alys jer ıt arqasy qııan jerden at sabyltyp, ádeıi amandyq bilýge keldik, - depti.

Olar Datqaǵa elden júz qoı, eki bıe, kıiz úı satyp alyp, datqaǵa syılapty.

Eki- úsh kún áńgime qyryp, olar keterde Datqa bylaı

deıdi:

-Jigittik ótti, Kárilik jetti,

Mal ketti- ekeýledi,

Qatyn shaıpaý, Bala tentek- tórteýledi,

Talaıǵa úlgi bergen Dosbol aǵalaryń

Aldaryna túsip ap mónteńdedi, - depti.