Asyra maqtaǵan da – aıypty

Omar (r.a.) taǵaıyndaǵan basshylardyń biri juma qutpasy kezinde Omardy jer-kókke syıǵyzbaı maqtaǵany sonsha, sahabalardyń bireýi shydaı almaı ornynan atyp turyp álgi kisimen shart-shurt sózge kelip qaldy.

Namaz bitkende meshitte bolǵan jaıt Omardyń (r.a.) qulaǵyna da jetken edi. Halıfa Omardyń ámirimen álgi sahaba dereý tutqyndalyp aldyna ákelinedi. Sahaba kirgen boıda halıfaǵa sálem beredi. Alaıda ózi ashýlanyp otyrǵan halıfa onyń sálemin almastan tipti jekip te jiberedi. Sol kezde sahaba:

– Eı, Omar, – deıdi julyp alǵandaı basyn kótergen kúıi, – men bir kiná jasasam, sen naq eki kiná jasap otyrsyń!

Buny estigende baǵanadan beri Omardyń alqymyna tyǵylǵan bar ashýy sap tyıylyp:

– Meniń eki kinám ne boldy sonda? – dep surady tańyrqap.

Sahaba taǵy da taısalmastan:

– Allanyń ber degen sálemin berip em, ashýmen sálemimdi almadyń. Iaǵnı ýájipti elemediń, bul – bir. Kináli adamǵa qulaq túrmeı jatyp bir jaqty ǵana úkim aıttyń, bul – eki, – dedi.

Buny estip sabasyna túsken Omar (r.a.) bolǵan jaıdy aıtyp berýin ótingende, ol bylaı dep túsindirdi:

– Sen taǵaıyndaǵan basshy qutpada seni jer-kókke syıǵyzbaı maqtaǵany sonsha, el seni Ábý Bákirden de artyq pa degen oıǵa qaldy. Alaıda, seniń Ábý Bákirge jete almasyń aıdan anyq jaıt. Men osyǵan kelispeýshilik bildirdim.

Omardyń tańǵalysy tipti arta túsip:

– Iá, nelikten men Ábý Bákirge jete almaıdy ekem? – dep surady.

Sonda álgi sahaba:

– Sol da sóz bolyp pa, – dedi óz sózin dáleldemek bolyp, - «jasaqqa qol ushyn berińder» dep Paıǵambarymyz buıyrǵanda, sen qolyńdaǵy maldyń jartysyn ǵana ákeldiń de, al Ábý Bákir bolsa ózine tyshqaq laq ta qaldyrmaı qolynda baryn túgel ákelip eldi bir jylatpap pa edi?!

Buny estigende Omar (r.a.) álgi sahabadan keshirim surap, ony erkine qoıa berdi. Artynsha jaǵympazdyq jasaǵan álgi basshyny jumystan bosatypty.

Qudaıberdi Baǵashar