Ashýshań molda
Baıaǵyda bir ashýshań molda bolypty. Balasynyń shýyn, áıeliniń nazyn, qurdasynyń qaljyńyn kótere almaı, qashan kórseń shyrt-pyrt bolyp júredi eken. Yzaqor minezi qansha jerde uıatqa qaldyrsa da, qalshyly esh basylmaı ómir súrip jatypty. Bir kúni juma namazyndaǵy qutpasynda yńǵaısyz suraqtar kóp qoıylyp, qulshylyqtan soń kóńili bolyńqyramaı qabaǵyn qaıshylap úıine kelse, áıeli as ázirlep úlgermepti, balasy tereze syndyryp qoıypty, kórshisi atyn suramaı minip ketipti. Ashýdan jaryla jazdaǵan molda eldiń bárimen urysyp, úıinen alysyraq ketip qalypty.
Eshkimdi kórgisi de, eshkimmen sóıleskisi kelmepti. Jaqyn mańdaǵy kól jaǵasynda qańtarylyp turǵan kóp qaıyqtyń birine mine salyp, darııanyń ortasyna bir-aq jetipti. Typ-tynysh tabıǵat ortasynda jalǵyz qalǵan jany jaı tapqandaı bolyp, táspisin tartyp, qulshylyqtan shyn lázzat alǵandaı sezimge bólenip: «E, jan tynyshtyǵy osy eken ǵoı!» – dep, kózin jumyp, múlgip ketipti.
Kenet qatty ekpinmen bir nárse kelip, qaıyqtyń búıirinen sart etkizip soǵyp, moldanyń jan dúnıesin astań-kesteń etip shaıqap jiberipti. «Sý ortasynda da tynyshtyq bermegen bul qaı kázzap?!» degen oımen ushyp túregelip, kózin asha sala qaharyn tógip jibergisi kelgen molda sileıip turyp qalady. Qarasa, muny baılaýy sheshilip ketken bir bos qaıyq kelip soqqan eken. Ómirinde birinshi ret kóz aldynda óshin alatyn adam tabylmaı, lyqsyp kelgen búkil záhar sózi kómeıinde keptelip qalǵan molda býynyńqyrap baryp basylypty. Birte-birte betiniń qyzyly da tarapty. Ashýy syrtqa shyqpaı, óz boıymen ábden basylyp bolǵan kezde ózi de sylq etip otyra ketipti de, ómirinde birinshi ret kózine jas alypty.
«Naǵyz qulshylyq degen sabyrmen óz boıyńdaǵy minińdi jyǵý eken ǵoı» degen aqıqatty ashqan molda keshkisin úıine bala-shaǵasy men dos-jaranyn ań-tań etip, adam tanyǵysyz múmin keıipte oralypty. Keıin ózin ashyq balaǵattap, jónsiz soqtyqqandarǵa nazar aýdarmaı, ómirdegi túrli qıyndyqtarǵa kúızelmeı, jymıyp qana júre beretin dárejege jetipti. «Mundaı haldi qaıdan taptyńyz? Jeke basyńyzǵa tıisýshilerge nege mán bermeısiz?» dep suraǵandarǵa álgi molda: «Bos qaıyqqa ashýlanyp qaıtem», – deıtin kórinedi.
