Arman urlaıtyn muǵalim

Úlken fermanyń qojaıyny óz úıiniń qabyrǵasyna bir kezde asyǵys salynǵan sýretti ádemi ramkaǵa salyp ilip qoıǵan. Qojaıyn jyl saıyn jazda fermasyn oqýshylar úshin demalatyn orynǵa aınaldyryp turatyndyqtan, ol jerge kóp adamdar kelip turdy. Sol kezde álgi ilýli turǵan sýret týraly bilgisi keletinder kóp bolǵanmen, ol aýyz ashpaıtyn. Suraqtaryn jaýapsyz qaldyratyn. Bıyl jazda uzaq ýaqyt saqtap kelgen sýretti qolyna alyp, oqýshy balalarǵa basynan ótken ómiri týraly áńgime qozǵady:

- Buryndary bir oqýshy bala bolypty. Balanyń ákesi at úıretetin qarapaıym adam eken. Bala bastaýysh synypta oqyp júrgende muǵalim bolashaqta kim bolatynyn, qandaı mamandyqty qalaıtyny týraly jazyp kelýge tapsyrma beredi. Sol túni oqýshy bala bir úlken fermanyń qojaıyny bolamyn dep óz armanyn jeti paraq sútteı aq qaǵazǵa jazyp, fermanyń nobaıyn sýretke túsirip shyǵady. Alaıda kelesi kúni muǵalim balanyń úı tapsyrmasyna sııasy qyzyl qalammen F qoıyp, bylaı deıdi:

- Balaqaı. Seniń armanyń oryndalmaıtyn arman. Qazir óz jaǵdaıyńa qarashy. Eger shynaıy oryndalatyn armanyń bolsa, jaqsy baǵa beremin!.

Úıine kelip túni boıy oılanǵan soń keshe jasaǵan úı tapsyrmasyn erteńinde qaıta sol kúıinde alyp kelip, oqýshy muǵalimge bylaı dep aıtqan eken.

- Muǵalim qandaı baǵa berseńiz de óz erkińizde. Biraq men óz armanymdy ózgerte almaımyn!

Fermanyń qojasy balalarǵa qarap taǵy da bylaı dedi: «Sender, sol balanyń júzege asqan armanynyń kýási bolyp tursyńdar. Bul sol bala salǵan sýret. Aınalaıyndar! Osydan biraz jyl buryn eń tómen baǵa qoıǵan muǵalim oqýshylaryn ertip, osy jerge kelip ketti. Ol kisi jylap, maǵan bir sóz aıtqan edi.

- Men oqýshylardyń armanyn urlaǵan urlyqshy muǵalim bolǵan ekenmin. Kóp oqýshylardyń ádemi armandaryn urladym. Al seniń jigeriń myqty bolyp, aıtqanyńnan qaıtpaı armanyńa jettiń..!

Koreı jazýshysy I. Dohýannyń qysqa áńgimeleri