AQYRET ISTERINDEGI PAIǴAMBARLARǴA MUQTAJDYQ
Alla Taǵala bylaı deıdi (maǵynasy): «Senen buryn bir paıǵambar jibersek, oǵan: «Kúdiksiz, Menen basqa eshbir táńir joq. Onda Maǵan ǵana qulshylyq qylyńdar» - dep qana ýahı etip, jiberdik». (Ánbııa súresi, 25-aıat)
Aqyret isterinde paıǵambarlar men sharıǵatqa muqtajdyq: Sharıǵattyń aqyret isterine qatysty senim men amaldaǵy barlyq úkimderin úıretip, baıandaıtyn bir kisige muqtajbyz. Óıtkeni adam ózdigimen aqyretke qatysty málimetke ıe bola almaıdy. Aqyret jaǵdaılarynan tek ýahı arqyly habardar bolady. Bul da bir paıǵambar arqyly múmkin.
Paıǵambarlar dúnıeniń pánı ekenin ashyqtaǵannan keıin aqyrettiń máńgilik meken jáne múlik ekenin, ol jerde múmin, salıh jáne baǵynǵan kisilerge Alla Taǵalanyń syıynan jáne jomarttyǵynan úlken saýap beriletindigin jáne jumaqtyń uly dárejeleri men kóptegen máńgilik nyǵmetin syılaıtynynan habar beredi.
Bul jaıynda aıatta bylaı delingen (maǵynasy):
«...Senderge ol jannatta kóńilderiń kóksegen nárseler bar. Sondaı-aq senderdiń tilegenderiń bar». (Fýssılat súresi, 31-aıat).
«Jábbar» jáne «Qahhar» Alla Taǵala dárgeıinde kápirler úshin máńgilik tozaq daıyndalǵany, kúnákarlar úshin qorqynyshty azap bar ekendigi tómendegi aıatta aıtylǵan:
«Shynynda zaqqum aǵashy; Kúnákarlardyń tamaǵy. Balqyǵan ken sııaqty qaryndarynda qaınaıdy. Qaınaǵan sý sekildi». (Dýhan súresi, 43-46-aıat).
Sonymen qatar Paıǵambarymyzdyń (s.a.ý.) barlyq adamdar men jyndarǵa jiberilgendigin, munyń tek Paıǵambarymyzǵa ǵana tán ekendigin bilý kerek. Sondyqtan barlyq adamdar men jyndar Paıǵambarymyzdyń (s.a.ý.) úmmeti. Iman etkenderge; «Úmmet-i ıjabát» - dep aıtylady. Iman etpeı kápir bolǵandarǵa; «Úmmet-i daǵýat» - dep aıtylady. Óıtkeni olar Islamǵa shaqyryldy. Biraq qabyldamady. Iahýdı, hrıstıan, májýsı jáne basqa kápirlerdiń barlyǵy Muhammed úmmetiniń shaqyrýyna kiredi. Biraq qabyldamady. Qazir olarǵa ıahýdı nemese hrıstıan dep aıtý jáı laqaptary ǵana. Al osy dáýirdegi Iahýdıler Musanyń (a.s.) úmmeti nemese hrıstıandar Isanyń (a.s.) úmmeti dep aıtý Paıǵambarymyzdyń (s.a.ý.) barlyq adamzatqa paıǵambar retinde jiberilgenin teriske shyǵarý bolady.
