ANANYŃ QYZYNA HATY...

Aıaýly qyzym!

Bir áıeldiń tazalyǵy eń aldymen otbasynan kóriledi, otbasyn aınadaı etip taza ustaıtyn áıel ár iske ıkemdi pysyq bolady, ózińe tıisti otbasyń bolǵan kúnnen bastap, erte turyp, basqalar oıanýdan buryn otbasyn tap-tuınaqtaı etip tazalaýdy ádet et, áıel bolý ońaı, al el súıinetindeı, eri súıetindeı áıel bolý mashaqatty sharýa.

Ol úshin, tynbaı qulshyn qyzym, erteńgi ıbaly kelin, asyl jar, aıaýly ana bolý úshin búginnen basta, meniń aldymnan basta. Shesheń bilgenin ómir boıy qulaǵyńa quıyp keledi, erteńgi kúnderdi pák nıetińmen kútip al, nıetiń taza bolmasa, istegen isińniń de, ustaǵan úıińniń de berekesi bolmaıdy. Erkeligińdi, balalyǵyńdy, ańqaýlyǵyńdy barlyǵyn týyp-ósken osy úıge qaldyryp ket, shesheń barlyǵyn qasterlep shańyraqqa ilip qoısyn!

Aqyldy qyzym!

Áıeldiń ekinshi tazalyǵy eriniń kıiminen biliner, qudaı qosqan jan joldasyńnyń kıimin rettep, jaǵaly kıimderin qasterlep usta, erińdi qurmetteýdi onyń kıiminen bastasań, el aldynda qurmeti artady. Ana-myna jerde ılektenip, kir bolyp, aıaq astynda qalmasyn.

 Erińdi qurmettegeniń erteńgi urpaǵyńnyń saǵan jasar syıy dep bil. Syrtqa shyǵa qalsa jaǵa-jeńin tap-taza etip, jyly qabaqpen shyǵaryp sal, ol kelgende kúlip qarsy alatyn bol!

Erińniń aldynda orynsyz ashýlanba, aıǵaılap sóıleme, ár ýaqyt aqylyńdy ǵana ózińe serik et.

Altyn qyzym!

Áıeldiń úshinshi tazalyǵy jatar orynnyń tazalyǵynan biliner, oryn kórpeńdi únemi dalaǵa jaıyp, jýyp-shaıyp taza usta, osy ister qarapaıym ǵana bolǵanymen kóp adamnyń qolynan kele bermeıdi. Ádette muntazdaı júretin keıbir jandar osyǵan mán bermeıdi. Al, qyzym, eń aldymen taza bol, ár kúnińdi tap-taza, kóńildi ótkiz, qysyr keńeske boı urma, barǵan jerińde aqyldy da, ıbaly bol!

Anasy qalaı, atasy qalaı demesin, aqylyńdy ǵana ózińe serik et!

Al, qyzym baqytty bol, kóńildi bol, máńgi jarqyrap-jaınap júre ber!

Qurmetpen: Anań ...