Ana sútiniń 10 artyqshylyǵy
Ana súti – ómir esigin jańa ashqan sábı úshin teńdesiz qorek. Ananyń aq sútin eshbir sút qospasy almastyra da almaıdy. Mamandardyń aıtýynsha, sút qospalarynda kezdespeıtin 400 túrli qorektik zat ana sútinde ǵana kezdesedi. Ana sútiniń taǵy qandaı biz bile bermeıtin 10 artyqshylyǵyn tizbektep kóreıik:
1. Ana sútiniń quramynda aǵzaǵa kerek barlyq nárlendirýshiler bar: belok, maı, túrli vıtamınder, gormondar, temir, kómir sý, mıneraldy tuzdar, kaltsıı, fosfat, ómirge kerekti mıkroElementter (selen, mys, myrysh, molıbden, magnıı, marganets), lıpaza, laktaza t.b. arnaı fermentter dep jalǵasyp kete beredi.
2. Eshqashan eki birdeı ana sútin kezdestirý múmkin emes. Quramy, maılylyǵy balanyń qajettiligine baılanysty ózgerip otyrady.
3. Ishek, respıratorly juqpaly, allergııalyq aýrýlardyń aldyn alady. Sondaı-aq ókpeniń qabyný qaýipin seıiltedi. Kalıfornııa ýnıversıtetiniń medıtsınalyq ortalyǵy emizý ýaqytyna qaraı balalardy birneshe topqa bólip, zertteý júrgizgen. Nátıjesinde 6 aıdan kóp ýaqyt emizilgen balalarda ókpe qabyný aýrýy 4 ese az kezdesetindigi, dıabet túrli juqpaly aýrýlardyń aldyn alyp, umytshaqtyqqa, as qorytý joldaryna paıdasy shash etekten ekenin anyqtaǵan.
4. Balanyń fızıkalyq ósýin damytady. Sana-sezimin jetildiredi. Amerıkalyq medıtsınalyq assotsıatsııasy jýrnaly jarııalaǵan maqalada úsh myń dat azamatyna on jyl boıy júrgizilgen túrli ıntellektýaldy testileý nátıjesinde týylǵan alǵashqy toǵyz aıda ana sútin emgenderde este saqtaý qabileti, aqyl-oı zerektigi anaǵurlym ozyq bolǵan.
5. Balanyń júıke-psıhıkasyn damytady.
6. Ana sútiniń quramynda A,E,D vıtamınderi óte kóp.
7. Balanyń artyq salmaq, semizdik aýrýlaryna shaldyǵýdyń aldyn alady.
8. Emizý balamen qatar anaǵa da paıdaly. Ol sút beziniń qaterli isikke shaldyqpaýyn 2 ese tómendetedi.
9. Ana sútin emgen balalar tez til tabysqysh, meıirimdi bolyp ósedi.
10.Emizý balany da, anany da jaıly sezimge bóleıdi.
Ana sútiniń osyndaı qasıetterine kózderi jetken Dúnıejúzilik densaýlyq saqtaý uıymy, Emizý jóninen Halyqaralyq keńesshiler assotsıatsııasy «Kún saıyn balańyzdyń ımmýnıtetin arttyryńyz! Balańyzdy ózińiz emizińiz!» dep dabyl qaǵýda. Sondaı-aq, BUU janyndaǵy Balalar qory balany emizý merzimi eki jyl ekenin ári 6 aıǵa deıin emshek sútinen basqa eshteńe bermeý kerektigin eskertýde. Al, bul jaıynda 1400 jyl buryn Quran Kárimde aıtylyp ketken edi.
«Emizýdi tamamdaǵysy kelgen kisi úshin; analar, balalaryn tolyq eki jyl emizedi».[1]
«Adamdarǵa; ata-anasyna qaraılasýdy buıyrdyq. Ananyń oǵan mesheýlik ústine mesheýlikpen júkti bolyp, eki jylda omyraýdan aıyrýy bar. Maǵan jáne áke-shesheńe shúkir et. Qaıtar ornyń Men jaq».[2]
Bálkim balany Alla Taǵalanyń bergen mundaı nesibesin qaqpaý kerek shyǵar!
