ALLANY ESKE ALÝDY TÁRK ETKEN JAN

Ertede taqýa bir kisi «Alla» dep kúndiz túni zikir* aıtady eken. Tipti kúndelikti zikirin aıtpastan tósegine jatpaıtyn kórinedi. Aıtatyn zikiri júregine ábden ornyǵyp, kóńili zikirden nár ala bastapty. Bir kúni shaıtan laǵyneti taqýa janǵa jaqyndap kelip, qulyǵyna:

– Kúndelikti úzdiksiz aıtyp júrgen zikirińdi qashanǵa deıin jalǵastyrasyń, kúndiz túni Alla deısiń, sol Alla saǵan ómirińde bir márte bolsa da «Áı, pendem!» dedi ma? – deıdi.  Sen aıtatyn zikirińniń saýabyn aldyń ba? Baıqaımyn, saǵan zikirińniń qarsylyǵyna eshnárse berilmegen sekildi. Onda sen bul kúnáharlyq kúıińmen zikirińdi qashanǵa deıin jalǵastyrmaqsyń?» – dep sybyrlaıdy.

Shaıtan laǵynetiniń azǵyrýy taqýa janǵa qatty áser etip, onyń júregi qobaljyp, biraz qaıǵylanady. Pende muny shyn kórip, men Allany eske alýǵa, zikir aıtýǵa laıyqty qul emes ekenmin, onyń ústine aıtqan zikirime qarsy jaýapta berilmeı jatyr, dep sol kúngi zikirin tárk etip, uıyqtap qalypty.

Sol túni túsinde Hazireti Qyzyr aleıhıssalamdy kóredi. Qyzyr oǵan;

– Alla dep zikir aıtýyńdy ne úshin tárk ettiń, ne úshin ókindiń? – dep suraıdy. Sonda taqýa kisi;

– Men únemi hám úzdiksiz «Alla, Alla» dep zikir aıttym. Biraq bir márte bolsyn Alladan «Áı, pendem!» degen bir qarsy jaýap estimedim. Sondyqtan men buǵan laıyqty bolmaǵandyqtan Qudaıdyń ashýyna ushyraımyn ba dep  qoryqtym?», – deıdi. Sol ýaqytta Hazireti Qyzyr aleıhıssalam taqýa janǵa:

– «Seniń árbir aıtqan «Alla, Alla» degen zikiriń, Onyń «Áı, pendem!» degeni emespe?! Ol saǵan «Áı, pendem!» demese, sen Ony (Allany) eshýaqytta eske ala almaısyń. Ol saǵan ıman bermese, sen Oǵan qulshylyq jasaı almaısyń. Ol seni jaqsy kórmese, sen Oǵan eshýaqytta yqylaspen zikir aıta da, týra jolmen júre de almas ediń. Seniń Alladan qorqýyńnyń ózi jáne Oǵan degen súıispenshiligiń – Onyń saǵan bergen úlken nyǵmeti. Sen «Ýa, Rabbym» dep eske alǵan saıyn, Ol seni tyńdaıdy jáne jaýap beredi. Eger Alla pendesiniń júregin mórlese, ol qul eshýaqytta Allany eske ala almaıdy. Alla pendesiniń jolyn ashpasa pende de duǵa ete almaıdy. Sen basyńa túsken kez-kelgen synaqta Alla deseń, onda Ol saǵan zikir etý úshin múmkinshilik bergeni. Qoryqpa, Alla Taǵalany árdaıym esińe alyp, zikirińdi aıtqaısyń, duǵa etýińdi jalǵastyrǵaısyń. Eshbir zikir de, duǵa da jaýapsyz qalmaıdy. Alla quzyrynda shańnyń tozańyndaı bolsa da jasaǵan amalyń bosqa ketpeıdi. Qudaı perǵaýynǵa baılyq berdi, biraq synaq bermedi. Ol tipti eńiregen de, aıqaılaǵan da joq. Basyńa kelgen synaq pen dert Allany árdaıym eske túsiredi. Tipti Allany umyttyrǵan baılyq pen densaýlyqtan da artyq» dep ósıet aıtqan eken.

Taqýa kisi de túsinen oıanyp, Allaǵa táýbe etip, keshirim surap, zikiri men duǵasyn ári qaraı jalǵastyrǵan eken.

Alla Taǵala kitabymyz Quran Kárimde Baqara súresiniń 152 aıatynda: «Endi, Meni eske alyńdar, Men de senderdi eske alamyn jáne Maǵan shúkirlik etińder de qarsy bolmańdar»,  dep  ashyq baıan etedi.

«Esterińde bolsyn,  Allany eske alýmen júrekter jaı tabady»,  dep baıan  etilgen. (Raǵyd, 28 aıat).

*Zikir aıtý – Allanyń esim sıpattaryn aıtý, aqyretti oılaý, Quran men hadısterde kelgen duǵalardy kóptep tilmen aıtý, Allany eske alý demek.

Daıyndaǵan – Turar TÚGELULY