ALLAǴA TÁÝEKEL ET! (Aıat)
Quranda: «Eger sheshim qabyldasań, Allaǵa táýekel et» («Álı Imran» súresi, 159-aıat) – degen zor mazmundy aıat bar. Bizdiń kópshiligimiz sheshim qabyldaýda kóp qobaljımyz. Qaısysy durys bolar dep, basymyzdy aýyrtamyz. Mundaı jaǵdaıda musylmannyń joldastarymen keńesip, Alladan qaıyrlysyn tileýi óte mańyzdy. Aınalasyndaǵylarmen aqyldasqannan keıin sheshim qabyldap, Allaǵa táýekel etip, iske kirisý qajet. Quranda «Álı-Imran» súresiniń 159- aıatynda Alla Taǵala:
«Jumysyńdy olarmen keńes. Sheshim qabyldaǵannan keıin Allaǵa táýekel et. Óıtkeni Alla Taǵala ózine senip, táýekel etkenderdi jaqsy kóredi», – degen. («Álı Imran» súresi, 159-aıat)
Qandaı da bir másele seni mazalasa, sol salanyń adamdarymen keńesý kerek. Sonan soń Alla taǵaladan qaıyrlysyn surap, nátıjede kóńili qaısysyn qalasa sony istegeni durys. Munafyqtyqtyń bir belgisi osyndaı jaǵdaıda túrli oı aıtyp, adamdy kúmándandyryp, ıgi josparlardy buzý bolyp tabylady. Óıtkeni olardyń ózderi árdaıym ekiushty oıda bolǵandyqtan, naqty sheshimge kele almaıdy. «Álı-Imran» súresiniń 167-aıatynda:
«Úılerinde otyryp alyp, týystaryna: «eger olar tilimizdi alǵanda, óltirilmes edi» degenderge, «ólimdi óz bastaryńnan arashalap alyp kórińdershi, eger aıtqandaryń shyn bolsa» – dep munafyqtardyń sózderin mysalǵa keltirgen.
Munafyqtar árdaıym «eger» degen sózderdi jıi qoldanady. Aıattaǵy «eger olar tilimizdi alǵanda, ajal qushpas edi» – degen sekildi.
Alaıda olar aqyret úshin qaısysy qaıyrly ekenin bilmeıdi. Sondyqtan olar «shirkin», «múmkin» degen sózdi óte jaqsy kóredi, bulardy jıi qoldanady. Óıtkeni olardyń ımany bolmaǵandyqtan árdaıym qıynshylyqtan qashyp, ońaıdy armandap, ne isterin bilmeı júredi. Olardyń osyndaı qubylmalyǵy jaıly Quranda «Nısa» súresiniń 142 – aıatynda: «Olar ne onda joq, ne munda joq, eki udaı musylman men kápirdiń ortasynda» – dep, birde musylmandarǵa, birde múshrikterge bolysyp, ekiarada júre beretindikterin aıtqan. Jáne bir hadıste: «Shyndyǵynda, munafyqtar eki otardyń ortasynda qalǵan mal sekildi», – degen. Sondyqtan olar árdaıym ekioıly júrgendikten, Allaǵa senip, táýekel ete almaıdy.
Ýıllıam Djeıms bylaı deıdi:
«Sol kúni oryndalýy kerek bolǵan isti oryndaýǵa bel býsań, ózińdi máseleniń nátıjesimen oılandyryp qoıatyn ýaıymnan tolyqtaı aırylasyń. Bul degenimiz – eger sen dálelge súıenetin jaqsy sheshimge kelseń, esh búgilmeı, qobaljymaı, artqa sheginbeı sony oryndaýǵa kiris. Ózinen keıin tek kúdik qana týǵyzatyn bos ýaıymmen ýaqytyńdy dalaǵa ketirme jáne artyńa qarama».
Sheshim qabyldaýdaǵy batyldyq qobaljý men kúızelisten qutqarady. «Muhammed» súresiniń 21-aıatynda:
«Iske bekingen sátte, Allaǵa bergen sózderinde tursa, olar úshin qaıyrly bolar edi», – degen.
