ALLAǴA QALAI SENÝ KEREK?

Alla Taǵala bar jáne jalǵyz. Odan basqa eshbir Táńir joq. Onyń bar bolýynyń basy da, sońy da joq. Ol barlyq ýaqytta bar bolǵan. Máńgilik bar bola beredi. Alla eshqandaı jaratylys ataýlyǵa uqsamaıdy. Oǵan teńdes, uqsas eshbir nárse joq. Allanyń bar bolýy ózdiginen. Ol esh nársege muqtaj emes. Barlyq nárse Oǵan muqtaj. Alla Taǵala – Tiri. Barlyq nárseni biledi, barlyq nárseni estıdi jáne kóredi. Júregimiz ben kókeıimizde jasyrǵanymyzdy bilýshi.

Alla Taǵalaǵa qalaý sıpaty tán. Ol qalaıdy jáne qalaǵanyn jaratady. Onyń qudireti sheksiz, barlyq nársege qudireti jetedi. Alla – Jaratýshy. Ol qalaǵan nársesin joqtan bar etedi jáne qalaǵanyn joq etedi. Búkil bolmysta ne bar bolsa, sonyń bárin de jaratýshy Alla Taǵala.

Alla Taǵala sóıleıdi. Biraq Onyń sóıleýine árip nemese daýys tán emes. Ol sózderin, buıryqtary men tyıymdaryn Elshilerine bildirgen. Qasıetti Quran kárim – Uly Alla Taǵalanyń sózi.

Alla Taǵalanyń meıirim-raqymy sheksiz. Keshirimi de óte mol.  Bizge ómir bergen, sanasa taýsylmaıtyn qısapsyz kóp nyǵmetterge bólegen de Alla Taǵala.

Ol bizdi jaratqannan keıin jalǵyz qaldyrmaǵan. Paıǵambarlar jiberip bizdiń bul dúnıede de, aqırette de baqytty bolýymyzdyń nurly jolyn taıǵa tańba basqandaı etip kórsetip bergen.

Alla Taǵala osylaı ıman keltirgen jáne Oǵan kóńilimen baılanǵan quldary ǵana eń ardaqty ornyn taýyp, tıisti qadirine ıe bolady. Bul senim adam júregin túrli jaman oılardan tazalap, jaqsy oı, izgi nıet, kórkem minezben árleıdi. Mundaı adam jalǵyz qalǵan kezderde de adamshylyqqa qaıshy, azǵyn isterge barmaıdy.  Óıtkeni Allanyń árdaıym kórip, bilip, baqylap turǵanyn biledi. Endeshe, Allaǵa ıman – barlyq jaqsylyqtyń qaınar bastaýy ekenin uǵynýymyz tıis.