ALLA TAǴALA JAQSY KÓRETIN SÓZDER

Alla – minsiz, kemshilik ataýlydan ada! Bar madaq pen sheksiz shúkir bir Allaǵa tán. Alladan basqa táńir joq! Alla uly!

Úmmý Hanı (Oǵan Alla razy bolsyn) bylaı degen: «Bir kúni Paıǵambarymyz (Oǵan Allanyń salaýaty men sálemi bolsyn) meniń hal-jaǵdaıymdy suraı kelgende men: Ýa, Allanyń elshisi! Men qartaıdym. Maǵan otyrǵan qalpymda isteı alatyn bir is aıtsańyz jaqsy bolar edi, – dep ótindim. Sonda Alla elshisi (Oǵan Allanyń salaýaty men sálemi bolsyn)  maǵan: Júz ret “Sýbhanallah”, – dep aıt. Rasynda, bul Ismaıyl urpaqtarynyń arasynan júz qul azat etkenmen teń. Júz ret “Álhamdýlılláh”, – dep aıt. Óıtkeni, bul er-turmany saqadaı saı júz sáıgúlikpen Alla jolynda kúreskenmen teń. Júz ret “Allahý ákbar”, – dep aıt. Óıtkeni bul qurbandyqqa ataǵan júz túıeńe teń. Júz ret “Lá ılááhá ıllallah”, – dep aıt. Rasynda, bul sózdiń saýaby jer men kóktiń arasyn toltyrady. Osyny oryndasań, sol kúni birde-bir adam seniń osy isińnen artyq ıgi is jasaı almaıdy. Tek, sen sekildi istegen adam ǵana saǵan jete alady, − dep aıtty»[1].

Sondaı-aq, osy hadıstegi atalmysh sózderdiń artyqshylyǵy jaıly Imam Mýslımniń Sahıh hadıster jınaǵy men Imam Ahmád ıbn Hanbáldiń «Mýsnád» atty hadıs jınaǵynda da hadıster bar. Sámýra ıbn Jýndýb (Oǵan Alla razy bolsyn) jetkizgen bir hadıste Paıǵambarymyz (Oǵan Allanyń salaýaty men sálemi bolsyn): «Alla Taǵalanyń eń jaqsy kóretin sózderi – “Sýbhanallah”, “Álhamdýlılláh”, “Allahý ákbar” jáne “Lá ılááhá ıllallah”. Bul sózderdiń qaısy birimen bastasań da báribir», − degen[2].

[1] Ahmád ıbn Hanbál, Mýsnádý ál-ansar 25675

[2] Sahıh Mýslım, Ádáb 3985; Ahmád ıbn Hanbál, Mýsnádý ál-basrıın 19248