Alla elshisiniń (s.ǵ.s.) eki muǵjızasy

Quraıysh múshrikteriniń Rúkána deıtin palýany bar edi. Jaýyryny jerge tımegen ol atyraptaǵy eń kúshti palýan sanalatyn. Bir kúni Rúkána Mekke mańynda otaryn jaıyp júrip, Alla rasýlymen ushyrasyp qalady. Alla rasýly odan: –  Eı, Rúkána, Alladan qoryqpaısyń ba? Haq dinge qashanǵy qarsylyq kórsete bermeksiń? – dep suraıdy. Alaıda Rúkána bul joly esh kútpegen tyń bir usynysty alǵa tartty:
–  Ýa, Muhammed, káne, kúreselik. Eger meni jeńseń, aıtqandaryńa moıynsunamyn.
–  Eger seni jeńsem, shynymen Islam dinin qabyldaısyń ba?
–  Iá, sen meni jeńetin bolsań, musylmandyqty qabyl etemin nemese myna qoılardyń bárin saǵan beremin. Al, men jeńsem, sen paıǵambarlyqtan birjolata bas tartasyń.

Ekeýi osy sózge toqtap, kúrese ketti. Á degenshe Alla rasýly Rúkánany jerge alyp urdy. Rúkána ekinshi ret kúreseıik dedi. Qaıtadan kúresti. Bul joly da palýannyń jaýyryny jer ıiskedi. Rúkána taǵy da kúrespek boldy. Úshinshi márte kúreskende de nátıje ózgermedi, Rúkána jeńildi.

–  Qudaı aqy, bul bir tań qalarlyq jaıt. Sen meni qalaısha jeńdiń? Aqylyma sııar emes. Sıqyryń sumdyq eken. 
–  Qalasań, budan da ǵajap muǵjıza kórseteıin, múmkin sonda aıtqandaryma ıligersiń?
–  Ol ne nárse? – dep surady Rúkána qyzyqqandaı.
–  Anaý ósip turǵan aǵashty janyma shaqyramyn, – dedi de, álgi aǵashqa qarap: «Allanyń ruqsatymen janyma kel», – dedi. Aǵash tamyrlarymen jerdi jyrtqan boıda beri qaraı jyljı bastady.
–  Rasynda, búginge deıin mundaı sıqyr kórmeppin, sen endi ony qaıtadan ornyna kóshir, – dedi Rúkána.

Paıǵambarymyz (s.ǵ.s.) taǵy ámir etkende, aǵash óz ornyna jetip jaıǵasty.  

Alla Elshisi:
–  Abyroıyń barda musylmandyqty qabylda, – dedi.
–  Qabyldamaımyn.
–  Olaı bolsa, men seniń myna otaryńdy alamyn.
–  Jaraıdy, al. Biraq jurtqa ne demeksiń?
–  Rúkánany kúreste jeńip, otaryn ıelendim deımin.
–  Rúkánamen jaı bástesip utyp aldym dep aıta salsań bolmaı ma?
–  Onda ótirik aıtqan bolamyn.
–  Barlyq sóziń men isiń jalǵan emes pe? – dep qoıyp qaldy Rúkaná. Buǵan renjigen Paıǵambarymyz (s.ǵ.s.) :
–  Otaryńdy almaı-aq qoıdym, kerek emes, – dedi keıip.

Rúkána bolsa «Qudaı aqy, sen menen áldeqaıda jaqsylyǵy mol, izgi jansyń» dep kúbirlep qala berdi. Biraq kópke deıin «bul sıqyr emes pe eken» degen kúdikten aryla almaı júrdi.  

Rúkána Mekke azat etilgennen keıin baryp Islam dinin qabyldady. Keıinnen Mádınaǵa sapar shegip bara jatqanda jolda qaıtys bolyp, sol jerge jerlendi.