Alla Elshisin (s.ǵ.s.) jaqsy kórý

Jaqsy kórý – júrek áleminiń jaǵdaıatyna baılanysty san alýan túrli. Keıbiriniń tynysh, keıbiriniki asaýdaı tolqyp turady. Tynysh júrek ıesi, mahabbatyna aparar joldaǵy qıyndyqtarmen sharshap-shaldyǵýǵa tóze almaıdy. Alaıda, tolqyp-tasyp turatyn júrekpen ǵashyq bolǵan jan – taýmen tasty jaryp shyqqan bulaqtardyń qanshama qashyqtyqty baǵyndyryp teńizge quıǵany sekildi ǵashyǵyna qol jetkize alady.

Tozaq otynan saqtandyryp, jumaqpen súıinshilep ótken paıǵambarlardy, ásirese kúlli adamzattyń asyl táji, paıǵambary, eki dúnıe sardary Muhammed Mustafany (s.ǵ.s.) jaqsy kórý – musylmandardyń paıǵambarlarǵa degen boryshtarynyń biri. Óıtkeni Alla Taǵala Quranda ata-ana, urpaq, mal-múlik, kásip sııaqty nárselerdi jaqsy kórý Alla men Paıǵambardan artyq bolmaý kerektigin baıandaıdy. Demek, Alla men Paıǵambardy jaqsy kórý barlyq nárseden joǵary turýǵa tıis. Paıǵambardy jaqsy kórý úshin eń aldymen Ony taný kerek. Al endi baǵytymyzdy Paıǵambardy tanytatyn tarapqa buraıyq:

Jaratylys jaǵynan bir pende, al Allanyń quzyrynda eń qurmetti de abyroıly, álemge raqym etip jiberilgen jalǵyz elshi ol – Muhammed (s.ǵ.s.). Quranda: «Seni búkil álemge raqym etip qana jiberdik»[1], – deıdi.

Iman men amal, sóz ben sóılem, is-áreket jáne búkil qarym-qatynasta úlgi tutylatyn jalǵyz jan ol – Muhammed (s.ǵ.s.).  «Rasynda, sender úshin, Allany da ahıret kúnin de úmit etkender jáne Allany kóp eske alǵandar úshin; Allanyń Elshisinde kórkem ónegeler bar»[2].

Alla Taǵalanyń ómirine ant etken jalǵyz paıǵambar ol – Muhammed (s.ǵ.s.). «(Muhammed Ǵ.S.) Ómirińe sert. Olar (nápsiqumarlyqtan) kózderi qaraýytqan halde, rasynda mastyqtarynda del-sal edi (bud halderinde eshqashan seniń sózińdi tyńdamaıdy)»[3].

Jasalǵan kúnálárdiń keshirilýi men Allanyń súıgen qulyna aınalý úshin – ámirine boısunyp, ıtaǵat etilýi kerek bolǵan jalǵyz paıǵambar ol – Muhammed (s.ǵ.s.). (Muhammed Ǵ.S.) olarǵa: «Eger Allany súıseńder, onda maǵan ilesińder. Sonda Alla Taǵala da senderdi jaqsy kórip, kúnálárińdi jarylqaıdy. Óıtkeni Alla asa jarylqaýshy, erekshe meıirimdi» de[4]. «Allany jaqsy kóremin» degen árbir ıisi musylmannyń, Paıǵambarymyzǵa ıtaǵat etýin shart qosýda. Al eger ıtaǵat etse, olardy jaqsy kóretindigin ýáde berýde.

Ardaqty Alla Elshisine ıtaǵat etý, súnnetterin oryndaý – Ony jaqsy kórý men súıispenshiliktiń nyshany emes pe… Óıtkeni, áz Paıǵambarǵa (s.ǵ.s.) sózsiz ıtaǵat etpeı, ámirlerine baǵynbaı jáne súnnetterin oryndamaı «Ony jaqsy kóremin» dep aıtý, bos sózden basqa eshteńe de emes. Al súıgen adam ǵashyǵynyń aıtqanyn mindetti túrde oryndaıdy jáne ár ýaqytta janynanda bolýǵa tyrysady. Sol sııaqty sóıleý, kıim kıiný, esinen shyǵarmaý, sózderin únemi qaıtalaý, soǵan uqsap-baǵý syndy áreketter – jaqsy kórýdiń belgilerinen bolyp tabylady.

Olaı bolsa, qanshalyqty Oǵan uqsaımyz? Biz Ony qanshalyqty jaqsy kóremiz? Ómirin jaqsy bilemiz be, qanshalyqty tanımyz? Qansha múbárák sózin jattadyq? Onyń ahlaǵymen sýsyndadyq pa? Onyń súıispenshiligine qol jetkizý úshin qandaı sebep izdedik? Qandaı joldarǵa tústik? Qandaı teris áreketterge Onyń súnnetin perde ettik?..

Múbárak máýlit aıy barshamyzǵa qutty, berekeli bolǵaı! Shapaǵat Iesi Mustafany (s.ǵ.s.) shynaıy jaqsy kórip, súnnetin berik ustanýdy Alla Taǵala barshamyǵa násip etsin!