Álemdegi eń baqytty adam bolǵyńyz kelse...
Myna bes kún jalǵan ómirde kimniń baqytty bolǵysy kelmeıdi deısiz?! Eger shynaıy baqytqa qol jetkizgińiz kelse – ózgelerdi baqytty etińiz! Əlbette, sol kezde siz olardan da kóbirek shynaıy baqytty sezine alasyz. Bilip qoıyńyz, basqalardy baqytty etý arqyly ózińiz baqytty bolasyz.
Muqtajdyń muńyn bólisip, tyǵyryqqa tirelgen pendelerge qol ushyn sozý, jany jabyrqaǵan jandardyń júzine kúlki uıalatý arqyly ózińizdiń baqytty bolýyńyzǵa jol ashylady. Ərbir adamǵa, meıli janýarlar men ósimdikter əlemi bolsyn olarǵa keltirgen tıtteı paıdańyz nemese qıyndyqtan qutqarǵan kishkentaı isińiz sebepti baqyttyń naǵyz dəmin sezinesiz.
Qazirgi tańda emhanada júregine nemese basqa da aǵzasyna shuǵyl ota jasalýy qajet bolǵan qanshama naýqas jandar bar. Keıbir otanyń tek shetelde jasalýyna qajettilik týyndaıdy. Ómir men ólim arasynda arpalysyp jatqan keıbir naýqastardyń əleýmettik jaǵdaılary múshkil keledi. Otany tóleýge qaýqarsyz. Mine, osyndaı ólim aýzynda jatqan bir naýqastyń otasynyń shyǵynyn ótep, otanyń sətti aıaqtalǵanynan keıin əlgi naýqas pen balalaryna qarasańyz, qýanyshtan tóbeleri kókke jetip, júzderinen jadyraǵan kúlki kóresiz. Qıyndyqqa tap bolǵan adamdarǵa qolushyn sozý Jaratqannyń quzyrynda uly saýaptarǵa keneltip, eki dúnıe baqytyna jeteleıdi.
Birde barǵan jerinde kim bolsa da, oǵan ornynan turyp, iltıpat kórsetetin sahaba Ibn Abbas (r.a.) Paıǵambar (s.ǵ.s.) meshitinde ıǵtıkafta (Allaǵa jaqyndaý maqsatymen, meshitte belgili ýaqytqa nıet bildirip, eshqaıda shyqpaı qulshylyq etý) otyrǵan edi. Qasynan júzi qaıǵy-muńǵa tolǵan bir kisini baıqaıdy. Ibn Abbas (r.a.):
– Júzińizden qaıǵy-muńdy kórip turmyn, sizdi nendeı nərse jabyrqatty? – deıdi əlgi kisige.
– Qaryzǵa batqanym sonshalyqty odan qutylýdyń jolyn kórmeı turmyn, – dedi ol muńaıyp.
– Olaı bolsa, sen úshin dənekerlik qylyp, qaryz ıesimen sóılesip berýimdi qalaımysyń? – degen Ibn Abbasqa (r.a) ol:
– Ərıne, qalaımyn, – dedi júzi nurlanyp.
Osylaısha Ibn Abbas (r.a.) qulshylyǵyn tastap, qaryzǵa batqan adamnyń qajetin óteýge shyqqaly jatyr edi, qasyndaǵylardyń biri oǵan: «Iǵtıkafta otyrǵanyńyzdy umytyp kettińiz be?» dep surady. Ibn Abbas (r.a.): «Əlbette, umytqanym joq», – deı kele janary jasqa tolyp: «Men Alla Elshisiniń (s.ǵ.s.): «Men úshin (musylman) baýyrymnyń qasynan tabylyp, qajetin óteý bir aı oraza tutyp, osy meshitte ıǵtıkafta otyrǵannan da artyq» degenin estigen edim», – deıdi.
Bul jerde kimniń orazasy jaıly aıtylýda? Ərıne, Alla Elshisiniń (s.ǵ.s.) orazasy. Kimniń ıǵtıkafy sóz bolýda? Ərıne, Alla Elshisiniń (s.ǵ.s.) ıǵtıkafy.
Paıǵambarymyz (s.ǵ.s.) ben onyń sahabalary ərqashan ózinen buryn ózgeni baqytty etýge talpynatyn, soǵan amal jasaıtyn. Al, biz she? Ózgeni baqytty etýge daıynbyz ba?
Nurlan Ramazanov
