Ákem estise...

Bir baqytty otbasy bolatyn. Kishkentaı qyz jáne onyń ákesi men sheshesi. Olar óte tatý-tátti ómir súrip jatty. Sony kóp kórgendeı me, kenet anasy aıaq astynan syrqattanyp qalǵany. Birshama ýaqyt tósek tartyp, jatyp qalady. Taǵdyrdyń jazǵanyna sharań bar ma? Aqyry pánı dúnıemen qoshtasady. Sábı kún saıyn ákesinen: «Mamam qashan qaıtyp keledi?» – dep suraıtyn. Al ákesi qyzyn jubatyp: «Qyzym, mamań óte alys bir jerge jumysqa ketti», - dep qushaqtap uıyqtatatyn.

Sóıte júrip, qyzy alty jasqa shyqqan jyly, ákesi meıirban, aqkóńil bir áıelmen tanysady. Bir kúni ákesi qyzyna: «Qyzym, mamań qaıtyp keletin boldy. Sen mamańnyń túrin umytyp qalǵan joqsyń ba?» – dep surady. Kishkene sábı ary oılanyp, beri oılanyp, basyn shaıqaıdy. Áke qyzyn aıap ketti ári bir jaǵynan sál de bolsa jeńildep qalǵandaı sezindi. Ol áli de bala ǵoı. Dál sol sátte esik ashylyp, álgi áıel kirdi de qushaǵyn keń jaıyp, qyzdyń esimin shaqyrady. Sál tańyrqap, jatyrqap turǵan qyzyna ákesi: «Qyzym, mamańdy tanymadyń ba? Tez «mama» dep shaqyra ǵoı», – depti. Sábı aqyryn adymdaı basyp baryp, «mama» dep qushaqtaı alady.

Keshki astan soń, áıel qyzǵa ilesip, onyń bólmesine kiredi. Ekeýi kóńildi áńgimelesip otyrǵanda qyz: «Siz meniń mamam emessiz», – deıdi kenetten. Áıel ári tosyrqap, ári tańyrqap qaldy. Sábı qyz shoshyp qalǵan áıeldiń qolynan ustap, báseń únmen: «Meniń mamam qaıtys bolǵan. Men ony atam men ájemniń áńgimelerinen bilip alǵanmyn. Muny tek atam, men jáne ájem úsheýmiz ǵana bilemiz. Ákem men basqalar bilmeıdi. Olar áli kúnge deıin mamamdy tiri, alys bir jerde jumys istep júr dep oılaıdy». Jylap jiberýge shaq qalyp turǵan áıeldiń qulaǵyna sybyrlap: «Bul ekeýmizdiń ortamyzdaǵy syr bolsyn. Ákeme aıtyp qoımańyz. Ol bilse, qatty jylaıdy» deıdi jańa tapqan anasyn qushaqtap.

Bulardy esik syrtynda únsiz tyńdap turǵan ákeniń kóz jasy kól bolǵan edi…