ADAMDARDY BIZ MUSYLMAN ETPEIMIZ!

Islam tarıhynda bireýdi bireý qınap musylman etkeni týraly oqıǵalar kezdespeıdi. Durys, ǵasyrlar boıy ıslamı ýaǵyz-nasıhat aıtylyp kelgen. Alaıda qashan da ýaǵyz tyńdaýshyǵa tolyqtaı tańdaý erki beriledi. Namazdyń jaqsy ekeni aıtylady, biraq ony oqý nemese oqymaý tyńdaýshynyń erkinde. Qasıetti Quranda: «Rabbyńnyń jolyna hıkmetpen (danalyqpen) jáne kórkem úgitpen shaqyr» degen buıryq túsken (Qarańyz, «Nahyl» súresi).  Baıqasańyz, munda da «adamdardy zorlyqpen shaqyr» degen sóılem joq.

Basqany bylaı qoıǵanda, kúlli musylman jurtshylyǵynyń eń úlgili tulǵalary bolǵan sahabalardyń ózi bir ýaǵyzdy estı salyp, birden ózgerip ketken joq edi. Olarǵa da aq pen qarany ajyratyp alý úshin ýaqyt kerek boldy. Hazret Omardyń musylmandyqty qabyldaýyna 5 jyldaı ýaqyt kerek boldy. Sondaı eń izgi urpaqtyń ózine Alla Taǵala ishkilik ishýdi birden tyıyp tastaǵan joq. Birte-birte, satylap tyıym saldy. Solaı emes pe? Solaı! Óıtkeni joǵarydaǵy aıatqa muqııat zer salsaq, onda seni tyńdaǵan adamnyń bárin kámil musylmanǵa aınaldyr degen buıryq joq. Onda «Rabbyńnyń jolyna shaqyr» degen pármen bar. Iá, «Rabbyńa!», «Allaǵa!» dep te turǵan joq, «Rabbyńnnyń jolyna» deıdi.  Mine, osy sózde tereń maǵyna jatyr. Jolǵa túsirý mańyzdy. Biraq ol jolda árkim ártúrli júredi. Bireý jyldam, bireý baıaý. Biraq olar óte aqyryn bolsa da jyljyp otyrady. Birden maqsatqa jete salmaıdy. Biraq olardyń sol jolda júrip bara jatqany mańyzdy. Alla Taǵala pendesiniń osy jolǵa túsýin qalap tur. Qurannyń tálimine súıensek, baryp turǵan naǵyz kápirlerdiń ózin zorlap dinge kirgizý joq qoı. «Kápirler» degen súrede: «Senderge óz dinderiń, al bizge óz dinimiz» dep anyq aıtylyp turǵan joq pa?

Al biz osyǵan keıde mán bermeımiz. Din talabyn birden oryndatý úshin urys-keriske deıin baratyn baýyrlarymyz bar. Baýyry namaz oqymaıdy dep onymen aralasýdy qoıǵan adamdar bar. Dindi ustanbaısyń dep ata-anasyna aýyr sóz aıtýshylar da ushyrasady. Munyń bári – adamdardy Allanyń jolyna shaqyrý emes, Allanyń jolynan alystatý áreketteri. Qattyraq aıtsaq, dál osy isterimiz úshin saýap emes, kúná arqalap qalýymyz da ǵajap emes. Máselen, syraǵa nemese araqqa sylqııa toıyp alǵan bir kisi meshitke kelse, biz qazir oǵan ne isteımiz? Barynsha tezirek syrtqa shyǵaryp tastaýǵa tyrysamyz. Bolmasa, oǵan aýyr sózder aıtýdan, uryp tastaýdan da taıynbaımyz. Sodan soń ol kisi ne isteıdi? Qaıtadan burynǵy ishkish dostaryna, araq satylatyn jerge qaraı ketedi. Biraq ol Allanyń jolyna qaraı bir qadam jasap edi ǵoı. Biraq biz onyń sol nıetin sý sepkendeı óshirip tastadyq. 

Endeshe, Rabbymyzdyń jolyna qalaı shaqyryp júrgenimizdi taǵy bir ret kóz aldymyzdan ótkizýimiz kerek sekildi, aǵaıyn!

Asylbek Áýezhanuly