ADAMDAR JAQSYLYQ JASAǴYSY KELEDI...
Máskeýdiń kez kelgen jerinen ózbekter ózderiniń ashanasyn ashyp tastaǵan. Biz turatyn Paveletskıı aýdany qalanyń ortalyǵy ári vokzal bolǵandyqtan kóshede adam kóp. Vokzaldyń qasynda ózbektiń ashanasy bar. Keshki segizden keıin barlyq zatqa 30 paıyz jeńildik bolady. (Máskeýdiń basqa aýdanynda turatyn kezimizde úıdiń qasynda ázirbaıjan ashanasy bolatyn. Keshkisin elý paıyz jeńildik bolady. Máskeýlikter keshkisin kezekke turatyn). Shynymdy aıtsam, jeńildik baryn da umytyp ketippin. Úıge alyp ketýge samsa men pırogqa tapsyrys berdim. Satýshy jas ózbek qyz: «Sál kútesiz be? Tórt mınýt qaldy. Jeńildik bolady» dedi. Qasyndaǵy basqa satýshy estip qoımasyn dep sybyrlap aıtty. «Túsinbedim» dedim. «Eki mınýt qalypty. Jeńildikpen esepteı berem» dedi daýsyn sál shyǵaryp. Biraq qasyndaǵy ekinshi ózbek áıel estip qoımasyn degendeı saqtanyp qarady. «Negizgi baǵasymen esepteı berińiz» dedim. Onyń maǵan jaqsylyq jasaǵysy kelip turǵan peıiline rıza bolyp qaldym. Ol óz qolynan keletin, óz deńgeıi jetetin jaqsylyqty jasaǵysy keldi.
Elde turǵanda Abaı kóshesiniń boıyndaǵy Halyqbankke baryp, áke-shesheme aqsha jibermek bolǵam. Ata-anam aýylda úı salyp jatyr edi. Anamda jeke shot baryn umytyp ketippin. Anamnyń ýdostoverenıesine jibermek boldym. Bank qyzmetkeri jas jigit: «Óte úlken komıssııa ustaıdy. Anańyzdyń ne ákeńizdiń esep-shoty bar shyǵar? Sol arqyly jibersek, az komıssııa ustaımyz» dedi. Jumystyń arasynda shyqqam, ári bizde jumysta, gazette asa erkindik berilgen joq, sál shyǵyp ketsek, izdeıtin. Oǵan qosa, áli maqalamdy da jazýym kerek, ári-beri júrgim kelmedi. «Jibere berińizshi» dedim. «Joq, oılanyńyzshy. On ese komıssııa tóleısiz be? Anańyzdan ne ákeńizden esep-shotyn bir aýyz surap kórińizshi» dedi. Mysaly, maǵan Halyqbank unamaıdy, onyń birneshe sebebi bar. Biraq sol jigittiń qolynan keletin kómegin jasap turǵany júregime bir jylylyq syılaǵan.
Úıdiń qasyndaǵy meshit janynda, dalada jaýrap, bir shal kókónis satyp turady. Qurbym ekeýmiz dúkennen almaı, ádeıilep qyzanaq, qııardy sol kisiden alamyz. Biz ashyp aıtpasaq ta, ol kisi de bizdiń nıetimizdi túsinedi. Túsingeni sol: biz barǵanda, mysaly, biz alǵaly turǵan kókónis 1020 teńge bolsa, myń dep aıtady. «Joq, alyńyz» dep qarsylyǵyna qaramaı aqshany tastap ketemiz.
Qart basyn qaıta-qaıta ızep, artymyzdan qarap turady. «Biz oǵan túk te jasaǵan joqpyz ǵoı» deımiz sosyn qurbym ekeýmiz.
