ADAMDAR...

Adamdar óz shamasyn asyra joǵary, ne ásirese tómen baǵalaıdy. Kemeldikke jetpeıtini sodan.

Adamdar ózin emes, ózgeni synaýǵa jattyqqan. Arazdyqtyń týatyny osydan.

Adamdardyń qabileti ózgeniń jetistigin emes, kemshiligin kórýge jetilgen. Alaýyzdyqtyń shyǵatyny sodan.

Adamdar iste múmkindik izdeýden góri syltaý izdeýge sheber. Tabysqa jetpeıtini sodan.

Adamdardyń qyzyǵý seziminen, qyzǵaný sezimi artyq damyǵan. Baqtalastyqtyń órshýi osydan.

Adamdar baıqustan buryn, baıǵa sálem bergish. «Ádiletsizdik tórkini tómennen» deıtini osydan.

Adamdar meni kútip qalmasyn deýden, ózim kútip qalmaıyn degish. Tákapparlyqtyń basy osydan.

Adamdar óziniń ornyn emes, ózgeniń ornyn kózdegish, ókinishten arylmaıtyny, óshteskish keletini sodan.

Adamdar ózge týraly bilýge emes, ózi týraly aıtýǵa qumar. Ózara túsinisýdiń  kem bolatyny osydan.

Adamdar kisilikti kishilikten emes, kidilikten izdegish. Kisimsýdiń shyǵýy osydan.

Adamdar saldardy sebepten demeıdi, kenetten deıdi. Kúdiktiń bastalatyny osydan.

Adamdar qurmetti abyroıdan emes, ataqtan keledi dep sengen. Dańqqumarlyqtyń asqynýy sodan.

Adamdar óz baǵasyn ózimen emes, alǵan syılyqpen ólshegish. Ataqqumarlyqtyń órshýi osydan.

Adamdar asyldy qupııadan emes, jarııadan izdegish, qadirdiń qashýy sodan.

Adamdar ónerdiń ózin tanýǵa emes, onyń ıesine tabynýǵa qumar, talǵamnyń tozǵyndaýy osydan.

Adamdar kóńilmen sezinetin dúnıege emes, kózben kóretin dúnıege qushtar. Dúnıequmarlyqtyń meńdeıtini sodan.

Adamdar baqı dúnıeden góri, pánı dúnıeni kóp oılaǵysh, ótkendi ańsaı beretini sodan.

Adamdar jazǵanynan góri, aty-jónin, túr-túsin tanytpaqqa qumar. Qarabaıyr haltýranyń órshıtini osydan.

Adamdar óziniń emes, ózgeniń minsiz bolýyn talap etkish, óshtiktiń bas kóteretini osydan.

Adamdar aqyl alýdan góri, aqyl aıtýdy artyq úırengen, sóz ben istiń qabyspaıtyny osydan.

Adamdarda kósemdikti tanýdan góri, kósem bolyp tanylsam degen esek dáme basym. Ǵumyrnamanyń kóp jazylýy osydan.

Abaı HAMZA