ADAM BOLMYSYNDAǴY ALAŃ MEN ÚREI SEZIMI

Pende paqyr keıde úreı men alańdy shatastyryp, kóńilsiz kúı keshedi. Adam ózine qatysty jan–dúnıeniń syryn ózi sheshe almasa, qoǵamdaǵy aqyl ıelerine júginip jatady.

Osy máselege qatysty qazaqtyń syrly-hıkmetti danalyǵynan syr shertip kóreıik.

Alań – adamǵa berilgen belgi. Úreı – ýaqytsha sezim. Úreı – keıin basylatyn qorqynysh túri. Mysaly, emtıhanǵa kirer aldynda turǵan oqýshynyń sezimi, bir isti qolǵa alǵan jannyń ol isti bastar aldyndaǵy qorqynyshy. Emtıhan tapsyrylyp, sharýa bitkesin adam ol sezimnen qutylady.

Al alań – adam bolmysynyń únemi mazasyz kúı keshýi. Muny taǵy da ýaıymmen shatastyrýǵa kelmes. Hákim Abaı: «Ýaıymdy ýaıym qyl-daǵy, ýaıymdy jeń» deıdi. Ýaıym ketiriledi. Adamnan jeńiledi. Al alań seni únemi alǵa tartady.

Alańnyń jóni basqa. Rýhtyń bulaısha mazasyz kúı keshýi jaqsylyqtyń nyshany eken. Tarıhta talaı danalar men álemdi jaýlaǵan patshalar osy alań kúıin ómir boıy sezinip ótken. Sondyqtan sol patshalar ómiriniń sońyna deıin mıssııasy úshin kúresti, danalar ilimi úshin rýhynyń alańynan esh qutylǵan emes. Sodan da olar sondaı úlken isimen tarıhta qaldy. Keı hákimder men áýlıeler sol ishki alańymen artyna eki dúnıelik azyq tastap ketti.

Alań kúıi seni mazalasa, seniń tegin adam bolmaǵanyńnyń belgisi. Sebebi jan jaıdan-jaı ózine-ózi kóńili tolmaı, birdeńeni atqarýy tıis kúı keshýi – seniń júzege asyrý qajet mıssııańnyń bar ekendigi.

Adam balasy ómirge jaıdan-jaı kele salmaıdy ǵoı. Jaratýshynyń adamzatqa jiberilgen kitaptary solaı deıdi. Ár adamnyń ómirge kelýinde úlken hıkmet, syr bar. Muny ár pende ońashada oılanyp, tolǵanyp, «Nege meniń atym adam?», «Myna ómirge kelýdegi maqsatym ne?» dep ózine úńilse jaqsy túsinedi.

ALAŃ – seniń atqarýyń tıis nárse bar degen sóz. Sebebi ol adamdy ishten mazany alady. Alań syrttan kelmeıdi. Demek, sen sol ómirge kelgen óz janyńa úńilip, sezinip, taýyp mıssııańdy júzege asyra bastaǵanyńda ǵana tynyshtalady. Al toqtatsań qaıtadan mazańdy alady. O, qudyrettiń kúshin-aı!

ALAŃ MAZAŃDY ALDY MA, DEMEK SENIŃ KÓKIREK KÓZIŃNIŃ AShYLǴANY. ÓMIRLIK MISSIIaŃDY JÚZEGE ASYRÝǴA BERILGEN BELGI.

OL ÚShIN PENDE BAIǴUSQA ERKINDIGI ASA QYMBAT.

ALLANYŃ QURANY SOLAI DEIDI. JARATÝShY QURANDA «ÓZIŃDI TANYMAI, QUDAIYŃDY TANYMAISYŃ» DEGEN. RABBYMYZ TÝRA JOLDAN BEZDIRMESIN.

Jaras AHAN