ABYSYN TATÝ BOLSA...
![](/img/articles/80a95c13f6a20dc4c053b41148e9f0ce.jpg)
Ertede bir-birimen teteles ósken eki aǵaıyndy jigit áıel, bala-shaǵasymen bir shańyraqtyń astynda ómir súredi. Ekeýi de, áıelderi de áı-sháı despeı, tatý-tátti ǵumyr keshedi. Enshi alyp bólek ketý, tipti, oılarynda da bolmaıdy. Balalary da týǵan baýyrdaı bir-birimen aralasyp-quralasyp ketedi. Olardyń mundaı tatýlyǵyna súısingen aýyl adamdary bir kúni ekeýinen munyń syryn suraǵanda, aǵasy «inimniń myqtylyǵy shyǵar» dese, inisi:
«Aǵamnyń keńpeıildiginiń arqasy ǵoı. Ata-anamyzdyń tárbıesi osyndaı bolatyn», - dep jaýap beredi. Muny estigen áıelderi (ıaǵnı abysyndar):
«Bul jerde bizdiń de birtalaı úlesimiz bar-aý, bular sony eskermedi ǵoı. Onda bir qyzyq jasaıyq», - dep ózara jospar qurady. Arada biraz ýaqyt ótkende, et jep otyrǵan inisine áıeli:
- Osy qaıyn aǵam bizdiń balalarymyzǵa únemi artqy sıraqty beredi. Kórdiń be, óz balalaryna adamdardyń aldy bolsyn dep aldyńǵy sıraqty berip otyr», - dep sybyr ete qalady.
Muny estigen kúıeýiniń kóńiline kúdik uıalap, oılanyp qalady. Osyndaı usaq-túıek dúnıeler jınala kele, inisiniń kóńilinde aǵasyna degen yza, kek paıda bolady. Kez kelgen nársege bola ilinisip, únemi kerisip júredi. Aqyry aralaryna syzat túsip, inisi basqa jaqqa qonys aýdarýǵa bekinedi. Ashýy tarqamaǵan kúıi «Úıdi jyǵyp qoı» dep áıeline tapsyrma beredi de, ózi aýyldastarynan úı kóshiretin at izdep ketedi.
Alaıda, eshkimnen jaramdy at taba almaı, keshke úıine kelse, áıeli úıdi jyqpaı otyr eken. «Jyqpaǵanyń durys bolypty, eshkim at bermeı jatyr» deıdi saly sýǵa ketip.
Áıeli: «Olaı bolsa, bir qoıdy soı, keshki astyń qamyn jasaıyq» deıdi de, maldyń sıraqtaryn alyp, «Mynanyń aldyńǵy sıraǵy qaısy, artqy sıraǵy qaısy, aıyryp bershi», - deıdi.
Kúıeýi ary qarap, beri qarap, ajyrata almaǵan soń aǵasynan baryp suraıdy. Aǵasy da ajyrata almaıdy. Sonda áıeli:
«Aldyńǵy sıraq pen artqy sıraqty eshkim de ajyrata almaıdy. Biz sizderdiń syılastyqtaryńyzdyń qaı jerge deıin jetetinin synamaq bolyp, osyndaı aılaǵa barǵan edik», - dep nazdanady. Sonda óziniń qateligin birden túsingen inisi yńǵaısyzdanyp:
«Etińdi kóbirek sal, etińdi kóbirek sal, menen bir qatelik ketken eken», - dep aǵa-jeńgesin qonaqqa shaqyryp, keshirim suraǵan desedi. Demek, týysyńmen tatý bolýdyń birden-bir kilti-abysyndar arasyndaǵy syılastyq eken...