Ábý Bákirdiń (r.a.) aqsha tólep jorytqan túsi
Ábý Bákirdiń (r.a.) ıslam dinin esh búkpesiz qabyldaýyna birneshe jaıt túrtki bolǵan. Sonyń biri myna oqıǵa.
Islam dini kelgenge deıin qysy-jazy saýdamen aınalysatyn Ábý Bákir kóbinese Shamǵa baratyn. Bir saparda tańǵa jýyq tańǵajaıyp tús kórdi. Túsinde aspandaǵy aı kelip onyń qushaǵyna tyǵylypty. Ábý Bákir aıdy qos qoldaı qushaqtap kókiregine qysqan eken. Tátti sezim qushaǵynda jatyp oıana ketse, túsi bolyp shyǵady. Dereý sol mańaıdaǵy Iamlıha atty tanymal monahqa baryp túsin jorytty.
Monah áýeli:
– Qaı jaqtan bolasyń? – dep surady. Ábý Bákir:
– Hıjaz aımaǵynan,- dep jaýap berdi.
– Nemen shuǵyldanasyń?- dep qaıta surady.
– Saýdagermin,- dep jaýap qatty. Buny estigende monah:
– Áı, arabstandyq jan, myna tús tegin tús emes eken. Shynyn aıtsam, úlken súıinshi túsip turǵan jaıy bar. Aqymdy berseń, dál qazir joryp bereıin, – dedi. Ábý Bákir (r.a.) oǵan sol mezet on eki dınar ustatty.
Monah sózin jalǵap, tústi bylaı dep jorydy:
– Kóktegi aıdyń saǵan túsýi – aqyrzaman paıǵambarynyń keletindigi. Taıaý ýaqyttarda ol óziniń «paıǵambarlyǵyn» jurtqa jarııalaıdy. Sen sol Paıǵambardyń qasynda júretin ýáziri, keıinnen halıfasy bolasyń. Ýa, arabstandyq jan, eger ol meniń tiri kezimde kelse, onda maǵan habar sal. Baryp jolyǵyp, ony óz kózimmen kóreıin. Al, ol kelgen kezde men o dúnıelik bolyp ketsem, onda meniń duǵaı-duǵaı sálemimdi jetkiz. Ákelgen jańa dinine meniń kirgenimdi, onyń úmmeti bolǵandyǵymdy aıt. Aqyrette maǵan shapaǵat etýdi umytpasyn!
Ábý Bákir buny estigende:
– Olaı bolsa maǵan hat jazyp qaldyr, – dedi.
Monah on eki sóılemmen jazylǵan hatty Ábý Bákirge usyndy. Hattyń tórkini mynadaı: «Assalaýmaǵaláıkým, ýa, Muhammed ıbn Abdýllah ál- Mákkı ál- Mádánı ál-tehamı! Sen – rasynda da aqyrzaman paıǵambary, on segiz myń ǵalamnyń Iesi Haq Taǵalanyń elshisisiń! Myna úshbý hatty Ábý Bákir ıbn Ábý Kúhafa arqyly ózińe joldap otyrmyn. Osy arqyly saǵan ılanyp, ımanǵa kelgenimdi, saǵan úmmet bolyp ergenimdi jetkizgim keledi. Ábý Bákir kelip, túsin jorytty. Sol tús boıynsha Ábý Bákir seniń ýáziriń keıinnen halıfań bolady. Eger men tiri tursam, senimen birge Alla jolynda ál-dármenimniń jetkeninshe kúresýden tartynbaımyn. Al eger oǵan ómirim jetpese, onda maǵan da aqyrette shapaǵat etýdi umytpaǵaısyń!».
Ábý Bákir túsin joryp bergen kisige qarap:
– Eger túsim dál osy joryǵanyńdaı bolyp shyqsa, onda menen taǵy da júz dınar alashaǵyń bolsyn, – dedi rıza keıippen.
Áne-mine degenshe Sham sapary da bitip, Ábý Bákir Mekkege keldi. Aradan on eki jyl ótti. Alla Taǵala haziret Muhammedke (s.ǵ.s.) ýahı túsirdi. Bir kúni Ábý Qubaıs taýyna shyqqan Muhammed (s.ǵ.s.) óziniń paıǵambar ekendigin jurtqa jar salyp, halyqty jansyz puttarǵa emes bir ǵana Jaratqanǵa ıman etýge shaqyrdy.
Tósekte jatqan Ábý Bákir aıtylǵandardy estı sala Mekke kósheleriniń birinde haziret Paıǵambarmen (s.ǵ.s.) júzdesti. Paıǵambarymyz ony Islamǵa moıynsunýǵa shaqyrdy. Ábý Bákir (r.a.) oǵan:
– Ýa, Muhammed! Paıǵambar ekendigiń ras bolsa, dáleldep muǵjızańdy kórset, – dedi.
Haziret Paıǵambarymyz (s.ǵ.s.) onyń kókiregine qolyn qoıyp, qabyrǵaǵa taqaǵan kúıi:
– Saǵan Paıǵambarlyǵymdy dáleldegen muǵjıza retinde osydan tup-týra on eki jyl buryn tús kórgeniń, ony Iamlıha atty monahqa jorytqanyń jetpeı me?! Oǵan tús joryǵany úshin jalma-jan on eki dınar tólediń, keıinnen taǵy da júz dınar bermek bolyp ýádelestiń. Tústi joryp bergen kisi on eki sóılemdik hat jazyp qolyńa ustatty. Qalasań tipti hattyń ár sózine deıin aıtaıyn, – dep hatty túgel jipke tizgendeı aına-qatesiz aıtyp berdi.
Buny estigende onyń Paıǵambarlyǵyna záredeı kúmáni qalmaǵan Ábý Bákir (r.a.) birden suq saýsaǵyn aspanǵa kóterip:
– Iamlıha monah súıinshilegen Paıǵambar rasynda da sen ekensiń, «Alla Taǵalanyń jalǵyz ekendigine ári Muhammedtiń onyń paıǵambary ekendigine nyq sendim», – dep birden musylmanshylyqqa bas ıgen eken[1].
Qudaıberdi Baǵashar
