ABAI ATAMYZDYŃ BIR SÓZI

Abaı atamyzdyń bir sózi jaıly mynadaı ulaǵat qalǵan:

Tobyqty elimen kórshiles tóleńgitten shyqqan Meńaıaq bı qaıtys bolǵanda, Abaı aza tutyp, duǵa oqıdy.

Artynan jınalǵan elge:

 - Meńaıaq óziniń atyn ózi alyp júre alatyn adam edi, - deıdi.

Azaly eldiń bir úlken adamy:

 - Abaı aý, sen dana emes pe ediń. Ol ne degeniń?! Meńaıaq óz atynyń basyn ǵana alyp júrgen emes, rýly eldi bılegen adam emes pe edi?! - deıdi.

Oǵan Abaı:

 - Eldi bıleýden adamnyń ózin-ózi bıleýi qıyn. Jaǵdaıy kelgenge baq kóterip, baı bolý, taqqa otyrý bola beredi. Biraq sonyń býymen ózin-ózi ustaı almaı, abyroıyn ashatyndar kóp. Meńaıaq sonan aýlaq jan edi. Onyń zor adamdyǵynyń ózi sonda edi, - depti.

***

Baılyq pen taqtyń býy degen sumdyq nárse... Adamdy lezde buzady! Rasynda adam buzylady. Nege? Óıtkeni túk kórmegen, ata-anasynan meıirim men ımanı tárbıe kórmegen, ýyzǵa jarymaǵan.

Onyń synaq ekenin de bir sát túsiný úshin, ony alyp júrý úshin de zooor ımanı tárbıe men júrekte meıirim bolýy kerek! Óıtpegende synaqtan súrinýiń bek múmkin!