Vıtse-mınıstr «Nur Múbarak» ýnıversıtetinde

23 qarasha 2023 797 0
Оqý rejımi

«Nur-Múbarak ýnıversıteti – din salasynda Eýrazııa keńistigindegi teńdesi joq ýnıversıtet» dedi Mádenıet jáne aqparat vıtse-mınıstri Qanat Ysqaqov.

Búgin Nur-Múbarak ýnıversıtetine arnaıy at basyn tiregen vıtse-mınıstr elimizdegi din máselesi óte ózekti ári ony bilimdi mamandarmen ǵana retteý mańyzdy ekenin basa aıtty. Vıtse-mınıstr Qanat Jumabaıulyn ystyq yqylaspen qarsy alǵan ýnıversıtet basshylyǵy áýeli oqý ordasynyń tynys-tirshiliginen habardar etti. Oqý keshenin, aýdıtorııalar men kitaphana, stýdııa, ashana t.b. aralap, jańadan boı kótergen qurylys jumystarymen de tanysty. Al ujymmen, ǵalymdar tobymen kezdesý barysynda vıtse-mınıstr óziniń ýnıversıtetke kelý sebebin elimizdegi din salasyna qatysty maqsattar men josparlardy ashyq talqylap, ýnıversıtet tarapynan usynys-pikirlerge zer salý ekenin atap ótti.

Vıtse-mınıstr: «Nur-Múbarak ýnıversıteti Qazaqstan men Mysyr eliniń arasyndaǵy dostyq qarym-qatynastyń nyǵaıýyna basty sebepker. Ári din salasynda otandyq mamandar tárbıeleýde Mádenıet jáne aqparat mınıstrligi úshin mańyzdy áriptes» dedi. Sondaı-aq qazirgi ýaqytta elimiz din salasyna qatysty kadr tapshylyǵyn sezinýde. Osy baǵytta jumysty nátıjeli atqaratyn, bilimdi jáne sapaly kadrlar tárbıeleıtin basqa ýnıversıtet joq ekenin basa aıtyp, osyǵan oraı ýnıversıtetke memlekettik jáne ákimdik granttaryn ulǵaıtý boıynsha tapsyrma beretinin aıtty.

Ýnıversıtet rektory, professor Muhammad ash-Shahhat vıtse-mınıstrdiń arnaıy kelgen saparyna rızalyǵyn bildirip, bul kezdesýdiń jemisti bolaryna senim bildirdi. Prorektor, PhD doktor Qaırat Qurmanbaev ýnıversıtettiń sońǵy 5 jyl barysynda atqarǵan jumystarymen qatar jańadan salynyp jatqan ǵımarattyń da jaı-japsaryna toqtaldy. Alqaly jıynǵa arnaıy kelgen Qazaqstan musylmandary dinı basqarmasynyń Apparat jetekshisi Ǵılymbek Májıev Bas múftı Naýryzbaı qajy Taǵanulynyń sálemin jetkize kele, dinı ortaq túıtkilder tóńireginde oıyn ortaǵa saldy. Túlekterdi jumyspen qamtý máselesiniń tıimdi joldaryn jetildirý jóninde talqylandy. Kezdesý barysynda ýnıversıtet qyzmetkerleri oılaryn ortaǵa salyp, vıtse-mınıstr árbir usynys-pikirdiń beı-jaı qalmaıtynyn aıtyp, qatysýshylarǵa serpilis syılady.

Derekkóz: Kazislam.kz

Pіkіrler Kіrý