QMDB TÓRAǴASY BAS MEShITTE JUMA ÝAǴYZYN AITTY (FOTO)

Búgin Bas múftı Naýryzbaı qajy Taǵanuly QMDB janyndaǵy Respýblıkalyq bas meshitte juma ýaǵyzyn aıtty.

«Ramazan – meıirim aıy» taqyrybynda ýaǵyz aıtqan Bas múftı: «Ramazan aıy – kúlli musylman álemi úshin qasıetti de berekeli aı. Paıǵambarymyz (oǵan Allanyń salaýaty men sálemi bolsyn) bul aı kirgende adamdardy bylaı dep súıinshileıtin bolǵan:  «Senderge Ramazan aıy keldi, bul berekege toly aı. Alla osy aıda orazasyn paryz etti. Bul aıda jánnat esikteri aıqara ashylyp, tozaq esikteri jabylady».

Ata-babalarymyz da bul aı kirisimen bir-birlerin quttyqtap, balalar úı-úıdi súıinshilep: «Muhammed úmbetine aıtqan jarapazan, orazań qabyl bolsyn ustaǵan jan!» – dep, jarapazan aıtatyn.

Bul aıda adamzat balasyn týra jolǵa, bilimdilik pen beıbitshilikke úndegen Qasıetti Qurannyń alǵashqy aıattary túsken. Bul qasıetti aıdy kúlli musylman jurtshylyǵy saǵynyp, erekshe qadirlep, asyǵa kútip alady.  Alla Taǵalanyń ámirine bas ıip, oraza ustap, muqtajdarǵa járdemdesip, taǵat-qulshylyqtar jasap, jan dúnıesi rýhanı demalady» dedi.

QMDB Tóraǵasy juma namazynan keıin elorda jamaǵatymen birge el amandyǵy men tynyshtyǵy úshin duǵa jasady.

​

Источник: Aidos