ALMATYDA ǴULAMALAR KEŃESINIŃ KEZEKTI MÁJILISI ÓTÝDE (FOTO)

26 mamyr 2024 342 0
Оqý rejımi

Búgin Almaty qalasynda Bas múftı Naýryzbaı qajy Taǵanulynyń tóraǵalyǵymen QMDB janyndaǵy Ǵulamalar keńesiniń 42-inshi májilisi ótýde.

Májilis jumysyn ashqan Bas múftı: «Ózderińizge belgili, 2024 jyldy «Islam jáne dástúr qundylyǵy» jyly dep jarııaladyq. Jyl aıasynda birneshe aımaqtyq aýqymdy sharalar, konferentsııalar, semınarlar josparladyq. «Allaǵa shúkir, Ǵulamalar keńesiniń jumysy joǵary deńgeıde ótip keledi. Sonyń nátıjesinde birneshe qoǵamǵa paıdaly, ózekti pátýalar jarııalandy. Tıisti kontseptýaldy qujattar qabyldandy. Kitaptarymyz jaryq kórýde. Osy oraıda atsalysqan barshańyzǵa shynaıy alǵysymdy bildiremin. Alla razy bolsyn!» dedi.

Aıta ketsek, búgingi májiliste «Ýákildik negizinde qarjylandyrýdyń úkimi», «Zeket qarjysyna muqtajǵa úı alyp berýdiń úkimi», «DNK arqyly tekti anyqtaý úkimi» taqyrybynda jazylǵan pátýalardyń mátini talqylanýda. Sonymen qatar túrkitildes memleketteri múftıler alqasynyń «Islam jergilikti halyq dástúrin qoldaıdy» qarary, túrkitildes memleketteri múftıler alqasynyń «Orta azııa fıqh mektebiniń pátýa berýge qatysty» erejesi talqylanýda.

Basqosý barysynda Ábý Nasyr Múbashshır at-Tarazı babamyzdyń «Arab aılaryn bastaýdy birizdendirý týraly zertteý» eńbeginiń tusaýkeser rásimi ótti. Eńbekti qazaqshaǵa aýdaryp, alǵysózin jazǵan – fılologııa ǵylymdarynyń doktory, professor Shamshádın Kerim.

Источник: Aidos

Pіkіrler Kіrý