JÁRDEM QALAǴAN ADAM

06 maýsym 2022 5183 0
Оqý rejımi

Birde Paıǵambarymyzdyń (s.ǵ.s.) sahabalarynyń biri ótken mashaqatqa toly kúnderin, muńǵa toly sátterin esine aldy. Ol kúnderi onyń áıeli men beıkúná sábıleriniń rızyqtaryn taýyp berýge de shamasy joq-tyn. Osynshama muńǵa toly sátterinde janyna jalaý, kóńiline medeý bolǵan, rýhyna kúsh berip, ómirine ózgeris engizgen bir aýyz sóz bolǵan edi. Joqshylyq pen kedeılik onyń saǵyn syndyrdy. 

Eshbir sheshim tappaı jan alqymǵa tirelgen shaqta áıelimen aqyldasyp, Alla elshisinen (s.ǵ.s.) kómek suraýǵa sheshim qabyldap jolǵa shyqty. Alaıda, sol sátte onyń oıyna Alla elshisiniń (s.ǵ.s.) myna bir sózderi keldi. Alla elshisimen (s.ǵ.s.) birge bolǵan bir keńeste ol (s.ǵ.s.): «Kimde-kim bizden járdem surasa, oǵan járdem beremiz. Alaıda, bir adam qolyndaǵyna qanaǵat etip, sabyrmen eńbek etse jáne Alladan basqaǵa muqtaj bolmasa, Alla ony eshkimge muhtaj etpeıdi»,– degen bolatyn. 

Búgingi keńeste Alla elshisi (s.ǵ.s.) osy sózderdi qaıtalady. Bul sózder onyń kókeıdegi oıyn aıtýǵa tosqaýyl bolyp, eshnárse aıtpastan úıine qaıtty. Úıine kelgende sol baıaǵy joqshylyq, kóńiline qaıaý salǵan muqtajdyq ony qaıta kútip turdy.

Kelesi kúni de dál osy jaǵdaı qaıtalanyp, Paıǵambarymyzdyń (s.ǵ.s.) sózin taǵy esitti. Ol taǵy eshteńe aıta almaı úıine qaıtty. Paqyrlyqqa qarsy turar qaýqarynyń joqtyǵyn sezinip qatty qınaldy.

Úshinshi kúni óz muqtajdyǵyn aıtýǵa bekinip, sahabalar keńesine qaıta keldi. Biraq Alla elshisi (s.ǵ.s.) sol sózderin taǵy da qaıtalady. Alaıda, óz qalaýyn bildirgeli kelip júrgen oǵan bul sózder sol kúni erekshe áser berdi. Bul sózder júregin tynyshtyqqa bólep, janyna qýat bergenin sezindi. Paqyrlyqtan qutqarar kúshtiń osy sózderde ekenin ańǵarǵandaı boldy.

Nábı (s.ǵ.s.) sózinen qýattanǵan ol shyn máninde onyń muqtajdyǵyn Allanyń ózi ǵana óteıtindigin túsinip, Alladan basqa eshkimge muqtajdyq etpeýge bekindi. Amanatqa berilgen dene men qabiletin paıdalanýdy, sondaı-aq joqshylyq qamytynan qutylýdy ishteı qalady. Sóıtip ol óz-ózine «Qolymnan ne keledi?» degen suraq qoıdy. Sol sátte shól daladan otyn jınap, ony satý aqylyna keldi. Kókeıdegi suraǵyna jaýap tapqan ol amanatqa balta surap alyp, shól dalaǵa otyn jınaýǵa ketti. Jınaǵan otyndy alyp kelip satýǵa kiristi. Eńbekpen tapqan nanynyń qanshalyqty tátti bolǵanyn sezdi jáne óz isinen lázzat aldy. Kúnder jyljyp eńbeginiń berekesin kórgen ol qarajattaı qor da jınap úlgerdi. Joqshylyq kúnder qol bulǵap artta qaldy.

Bir kúni ol Muhammedti (s.ǵ.s.) kezdestirdi. Adamzat asyly (s.ǵ.s.) onyń júzine kúlimdeı qarap: «Kimde-kim bizden járdem surasa, álbette járdem beremiz. Alaıda, kimde-kim qolyndaǵysyna qanaǵat etip, sabyrlyqpen Allaǵa ǵana muhtaj ekenin túsinse, Alla ony eshkimge muhtaj etpeıdi» demep pe edim», – dep, sol baıaǵy ómirine azyq bolǵan sózderin qaıtalady.

Ýslý kafı 2-tom. 139-bet
Qanaǵat baby

Pіkіrler Kіrý