MEN JEMEGEN BALMUZDAQ

25 aqpan 2022 5320 0
Оqý rejımi

Birde jazdygúni ákemmen ilesip aýyldan qalaǵa kelgen bolatynmyn. Shirkin, sol kezdegi aýyl balalarynyń bir armany – qalaǵa baryp balmuzdaq dámin kórý bolatyn. Meniń de bar oıym balmuzdaq jeý edi. Bul týraly ákem de biletin. Ákem ekeýimiz bazardan úıge kerek-jaraqty alyp bolǵan soń, balmuzdaq satatyn apaıǵa kezekke turdyq. Aldymyzda bala-shaǵasyn ilestirgen yǵy-jyǵy halyq. Sálden soń balmuzdaq satatyn apaı men bizdiń aramyzda bir ǵana januıa qaldy.

Bul januıa maǵan úlken áser qaldyrdy. Qatarda jasy 5-12 aralyǵyndaǵy 5 bala boldy. Olardyń túrine qarasań, baı januıadan emestigin birden bilýge bolady. Kıimderi arzan kóringenimen, tap-taza. Barlyǵyda tártippen biriniń artyna biri kezekke turyp, ákesi men anasynyń qolynan qysyp ustaýda. Balalar bir-birine balmuzdaq jeıtinderin aıtyp, máz-meıram. Ákesi men anasynyń da kóńilderi bıik. Ekeýi bir-birine dán rıza. Anasynyń balalarynyń aldynda ákelerin joǵary qoıatyny baıqalyp-aq tur. Meniń kóz aldymda naǵyz baqytty otbasy turdy.

Sodan satýshy apaı qansha balmuzdaq kerektigin surady. Januıa ákesi áıeli men balalaryna qarap: «Jeteý» dedi anyq daýyspen. Satýshy apaı jalpy jeti balmuzdaqtyń baǵasyn aıtty. Baǵany estigen áıeli kúıeýiniń qolyn jiberip, basy tómen túsip satýshydan baǵany qaıta surady. Satýshy jalpy baǵasyn qaıtalady. Aqshalarynyń jetpeıtindigi júzderinen anyq baıqaldy. Kóńilderi áp-sátte buzylǵan áke men ana bes balasyna aqshamyz joq dep qalaı aıtsyn?!

Bul oqıǵany basynan baqylap turǵan ákem qaltasynan qalǵan júz teńgesin alyp, jerge túsirip jiberdi (bizde jaǵdaıy shalqyǵan otbasy emes edik). Sodan soń 100 teńgeni alyp, álgi januıa ákesiniń ıyǵyn qaǵyp: «Keshirińiz, mynaý sizdiń qaltańyzdan túsip qaldy», – dedi. Ákesi bárin túsindi. Ol ákemniń kózine tike qarap, qolyn 100 teńgemen birge qysty da, kózine jas alyp: «Rahmet, rahmet sizge! Rasymen de, bul – meniń januıam úshin úlken mańyzǵa ıe!» – dedi.

Ákem ekeýmiz úıge alǵan kerek-jaraqtarymyzben aýylǵa qaıttyq. Bul kúni men balmuzdaq jeı almadym, degenmen baqyttyń dámin tattym.

Bul oqıǵa esimnen áli kúnge deıin keter emes. Sol kúni men sábılik kóńilmen ákeme az da bolsada renjigendeı bolyp edim. Al,  qazir oılasam ákemniń sondaı aqylgóı, júregi jylýǵa toly jan bolǵanyn maqtan tutamyn. Bir ákeniń tárbıesin júz mektep bere almaıtynyny da osydan. Urpaǵyn jaqsy isterge baýlyǵan asyl ákelerimiz aman bolsyn!

Pіkіrler Kіrý