Ana men áıel – tarazynyń eki basy

02 tamyz 2021 399 0
Оqý rejımi

Ana men áıel tarazynyń eki jaǵy. Bireýiniń esesinen ekinshisi jábir-japa shegedi. Talaı aqjaýlyqty ana, ózegin jaryp shyqqan perzentiniń sol tarazyny durys ustaı almaǵanynan, qorlyq kórip, balaǵat sóz estip tipti taıaq jegeni bar. Keıbiri ómiriniń meıirimdilik pen qamqorlyqqa eń qajetti shaǵynda qarttar úıinen bir-aq shyqqan. Mundaı qorlyqty baýyr eti balasynan kórýi qasiretin eki ese ashy ete túsedi. Sirá, basqa eshkim ondaı zulymdyq jasamasa kerek. Jaýyna emes meıirban anasyna jasaıdy, bıznestegi qarsylasyna emes besikte jatqanda aq sútin berip, tún uıqysyn tórt bólgen anasyna jasaıdy. Al, ana balasy uıyqtasa ǵana demalady. Balasy tamaqtanyp qarny toıǵan soń ǵana aýzyna bir túıin nan salady emes pe? Jalǵan dúnıedegi eń abzal janǵa munshama qattylyq pen dórekilik qandaı shyǵýda?! Áıeliniń kóńilinen shyǵý úshin be? Álde, áıeline degen mahabbatyn kórsetý úshin be? Mundaı zulymdyqty estigen tasjúrek adamnyń ózi titirkenip shoshıtyn bolar. Bul adamnyń oıyna kelmeıtin jaýyzdyq. Aqyl-parasat qabyl ete almaıtyn zulymdyq emes pe?

Anasynyń qos bilegine altyn-kúmis bilezik taqsa, eń ádemi kóılek kıgizse jaraspaı ma? Anasynyń ár kúnin shýaqty, ár sátin baqytty etse kóp pe? Ár kúnin anasyna jaqsylyq etýden bastasa quba-qup bolar edi. Ári bul ómir syılaǵan anasyna perzenttiń jasaǵan bolmashy ǵana jaqsylyǵy bop esepteler edi. Óıtkeni, anasyn arqalap Kaǵbany taýap etip júrgen adamǵa sahaba Abdýlla bın Omar: «Seni jaryq dúnıege alyp keler sáttegi anańdy shydatpaı qysqan tolǵaqtarynyń birin de óteı almadyń, biraq bul jasaǵan isiń izgilik, jaqsylyǵyńdy toqtaýsyz jasaı ber», - dep aıtýy sonyń bir aıǵaǵy. Óziniń bar jaǵdaıyn jasap, al anasyn qaraýsyz qaldyrǵan beıbaqtardyń júreginen meıirimdilik ataýy joǵalǵan zaman týdy. Biraq, sol meıirimsizdigi úshin eń Meıirimdi Haq Taǵala quzyrynda jaýap beretini sózsiz. Mundaı bezbúırek perzent aýyr jazaǵa ábden laıyqty.

Árıne, anaǵa jasalatyn qamqorlyq pen jaqsylyq áıelińizge tıesili aqysynan alynbaıdy. Ómirlik jaryńyzdy qaraýsyz qaldyryńyz degen sóz emes. Anańyzdy kóńilinen shyǵý úshin áıelińizdi balaǵattap, taıaqtyń astyna alyńyz degen de sóz emes. Áıel – amanat. Nekelesý arqyly Alla Taǵala quzyrynda áıeldi tósekte adal jar, ómirde serik etemiz. Sondyqtan da áıelge jaqsy qarym-qatynasta bolý musylmannyń jaqsy sıpattarynyń biri.

Biraq, áıelińizge jasalǵan jaqsylyq anańyzdyń esebinen bolmaýy qajet. Jaratqan Alladan jáne Elshisinen keıingi eń qadirli de ardaqty jan bolǵan anańyzǵa arnalǵan meıirimdilik pen qamqorlyq esebinen bolmaýy kerek. Qursaǵynda toǵyz aı kóterip, ólim men ómir arasynda dúnıege alyp kelgen, aq sútimen birge bar jaqsylyqty balasynyń boıyna sińirgen eń abzal janǵa jaqsylyq birinshi kezekte ári eselep jasalýy kerek.

Anańyzdyń sizdiń júregińizdegi orny áıelińizge jáne ul-qyzyńyzǵa degen súıispenshilikten áldeqaıda bıik turýy kerek. Anańyzdy ornyna eshbirin qoıýǵa bolmaıdy. Sizdegi bar jaqsylyq pen izgiliktiń qaınar bulaǵy – aqjaýlyqty anańyz. Ómirdegi barlyq jetistiktiń sebebi anańyzdyń aq tileginiń arqasynda. Sondaı-aq, sátsizdik pen súrinýińizdiń basty sebebi de anańyz qos janarynan tamshylaǵan jastary. Alaqanyn jaıyp, qarǵys aıtpasa da kóńili aýyryp, kózine jas tolsa bolǵany, sizdiń ómirińizde sátsizdikter bastalady. Bizdiń qoǵamda dilimizge de, ulttyq sanamyzǵa da jat bir zań qalyptasqan, ol anańnyń kóńilin tapsań, áıeliń renjıdi nemese anama alyp beretin bolsam, áıelime bermeýim kerek degen «zań». Tarazynyń basyn teń ustaý qıyn degen sııaqty eshbir jerde jazylmaǵan, oıdan shyǵaryp alǵan qısynsyz uǵym. Árıne, mundaı túsinik qate. Ananyń orny erekshe, áıeldiń de jóni bólek. Árqaısysynyń ózine tıesili aqysy bar. Biriniń aqysyn jasaýmen ekinshisi eshbir jábir kórmeýi tıis.

Sózdiń toqeteri áıelińizdi anańyzben salystyrmańyz. Quran Kárimniń ózinde bir aıatta ata-anany qatar aıtsa, basqa aıattarda aqjaýlyqty anany qaıta-qaıta jáne tek jalǵyz ózin ǵana baıandaýy tekten-tek emes.

Pіkіrler Kіrý