قامقورلىعىمداعى جەتىم بالانىڭ دۇنيەسىن پايدالانا تۇرسام بولا ما؟
اسسالاۋماعالەيكۋم! جول اپاتىنان اعامىز بەن جەڭگەمىز قايتىس بولىپ، ولاردىڭ جالعىز ۇلى ٴبىزدىڭ قولىمىزدا قالدى. ارتىنداعى قالعان دۇنيەلەرىن وسكەندە بالاسىنا بەرەمىز. ٴبىراق سول اقشادان قولدانۋىمىزعا نەمەسە قارىزعا دەپ پايدالانىپ، كەيىنىرەك قايتارساق بولادى ما؟

 

ۋا الەيكۋم اسسالام!

مۇنداي جاعدايدا بالانىڭ مال-دۇنيەسىن پايدالانۋعا بولمايدى. جەتىم بالاعا تيەسىلى دۇنيەنى تەك قانا سول بالانىڭ قاجەتتىلىكتەرىن وتەپ، تۇرمىس-تىرشىلىگىن قامتاماسىز ەتۋگە عانا رۇقسات بەرىلەدى. وزگە كىسىلەردىڭ قولدانۋىنا حانافي ٴمازھابىنىڭ عۇلامالارى قاتاڭ تۇردە تىيىم سالعان. ٴتىپتى، قارىزعا دەپ جازىپ قويىپ پايدالانۋعا دا قارسى.[1] مۇنداي ٴپاتۋاعا بارۋلارىنىڭ سەبەبى – قۇران كارىمنىڭ جەتىمدەرگە قاتىستى ايتىلعان اياتتارىندا قاتاڭ ەسكەرتۋلەر بار دەپ تومەندەگى اياتتاردى كورسەتەدى:

1) جەتىمدەرگە مال-دۇنيەلەرىن بەرىڭدەر[2]

2) راسىندا، جەتىمدەردىڭ مال-دۇنيەسىن ز ۇلىمدىقپەن جەگەندەر وزدەرىنىڭ قارىندارىن وتپەن تولتىرعاندار[3]

3) جەتىمدەرگە ادىلەتتى بولىڭدار[4]

ال، «كىمدە-كىم كەدەي بولسا، مۇقتاجدىعىنا قاراي جەسىن»[5] دەگەن اياتتىڭ ۇكىمى جويىلعاندىعىن العا تارتقان. وزگە ٴمازھابتىڭ عۇلامالارى «بۇل اياتتىڭ ۇكىمى جويىلماعان، قاراماعىنا العان كىسى مۇقتاج بولسا، ولشەممەن جەۋىنە رۇقسات بار. تاربيەلەپ، باعىپ وتىرعان اقىسى رەتىندە ەسەپتەلەدى. كەيىن بايىپ كەتسە ورنىن تولتىرۋى كەرەك» دەگەن پىكىرلەرىن ايتادى.

دەمەك، جەتىم بالانى باعىپ وتىرعان كىسى، بارىنشا جەتىمنىڭ مال-مۇلكىنەن ساقتانۋى قاجەت. جەتىمدەر ۇيىندە جۇمىس ىستەيتىن ادامدار ٴۇشىن ٴبىل تىپتەن قاجەت نارسە. بالالارعا بولىنگەن ازىق-تۇلىك، كيىم-كەشەكتەردەن الىپ كەتۋدەن ساق بولسىن. ونىڭ ناتيجەسى توزاق بولاتىنىن ۇمىتپاعانىمىز ٴجون.

عازيز احمەت.
«ازىرەت سۇلتان» مەشىتىنىڭ نايب يمامى



[1] سابۋني، مۋحامماد الي، ٴراۋايعۋل-بايان في ٴتافسيري اياتيل-احكامي ٴمينال-قۋران، 414-بەت.
[2] «نيسا» سۇرەسى ،2-ايات.
[3] «نيسا» سۇرەسى، 10-ايات.
[4] «نيسا» سۇرەسى، 128-ايات.
[5] «نيسا» سۇرەسى، 6-ايات.

 
date16.02.2018readCount964categoryٴارتۇرلىprintباسىپ شىعارۋ