«بيتۆا ەكستراسەنسوۆ» باعدارلاماسىن كورۋگە بولا ما؟
اسسالامۋعالەيكۋم! تەلەديداردان بولاتىن "بيتۆا ەكستراسەنسوۆ" باعدارلاماسىن كورۋگە بولا ما؟ جادىرا

ۋاعالەيكۋماسسالام ٴۋا راحماتۋللاھي ٴۋا باراكاتۋھ!

قۇرمەتتى جادىرا، اتالمىش باعدارلاما كوپشىلىككە ارنالىپ كورسەتىلەتىن، ارنايى دايىندالعان شوۋ دەپ ويلايمىن. وڭشەڭ جىن-شايتانمەن بايلانىس قۇراتىندار مەن وتىرىكشى الاياقتاردىڭ جان-جاقتان جينالىپ الىپ، كومەستىڭ جارشىسى رەتىندە وزدەرىن الەمگە پاش ەتەتىن باعدارلاما. ەگەر دە، سول جەردە جينالعانداردىڭ ساۋەگەيلىكتەرى راس بولسا، نەگە پوليسيا قىزمەتكەرلەرىنە ۇرلىقشىلار مەن اسا ٴقاۋىپتى قىلمىسكەرلەردى ۇستاپ بەرمەيدى؟  

ٴدىنىمىز باقسى-بالگەرلەرگە، كورىپكەلدەرگە بارۋدان قاتاڭ تىيعاندىعى جاسىرىن ەمەس. وعان قاتىستى ايتىلعان ارداقتى پايعامبارىمىزدىڭ كوپتەگەن حاديستەرى بار[1]. سونداي ٴحاديستىڭ بىرىندە اللا ەلشىسى بىلاي دەيدى:

«كىمدە-كىم كورىپكەلگە (ارراف-العَرَّافُ) كەلسە جانە ودان ٴبىر نارسە سۇراپ، ايتقانىنا نانسا، ونىڭ قىرىق كۇندىك نامازى قابىل بولمايدى»[2].

اتالمىش ٴحاديستىڭ ارابشا ماتىنىندەگى «ارراف-العَرَّافُ» سوزىنە مىناداي انىقتاما بەرىلەدى: الدەبىر جوعالعان نەمەسە ۇرلانعان زاتتىڭ قايدا ەكەندىگىن، ياكي كىمنىڭ ۇرلاعاندىعىن، ۇرلىقشىنىڭ ٴتۇر-سيپاتىن ت.ب. نارسەلەردى ەشقانداي لوگيكالىق ياكي عىلىمي ايعاقتارعا سۇيەنبەستەن بولجايتىن ادام. وسى انىقتاماعا قاراعاندا حاديستەگى تىيىم ەكستراسەنستەردى دە قامتىپ تۇر.

توق ەتەرىن ايتقاندا، اتالمىش باعدارلاما دىنىمىزگە قايشى. مۇسىلمان كىسى ونداي باعدارلامالارعا ۋاقىت سارپ ەتكەننەن گورى، كىتاپ وقۋ سياقتى وزىنە پايدالى دۇنيەلەرمەن اينالىسقاندىعى دۇرىس. قۇران كارىمنىڭ «فۇرقان» سۇرەسىندە: «ولار وتىرىككە ايعاق بولمايدى» دەسە[3]، «اعراف» سۇرەسىندە: «سەن كەشىرىمدىلىك جولىن ۇستان. دۇرىستىقتى بۇيىر. ٴارى نادانداردان بەت بۇر»، - دەلىنگەن[4].


[1] احمەد – 2/429 بەت
[2] ٴاحماد يبن ٴحانبال، ٴمۇسناد
[3] "فۇرقان" سۇرەسى، 72-ايات
[4] "اعراف" سۇرەسى، 199-ايات

date04.09.2017readCount1877categoryٴارتۇرلىprintباسىپ شىعارۋ