پايعامبارىمىز (س.ع.س.) ليتر سۋعا عۇسىل العان با؟
اسسالامالەيكۋم. پايعامبارىمىز (س.ع.س.) 3 ليتر سۋعا عۇسىل العان دەپ ەستۋشى ەدىم. وسى قانشالىقتى راس؟ عۇسىل قۇيىنۋ ٴۇشىن قانشا سۋ قاجەت؟ جاندوس

ۋاعالەيكۋماسسالام. پايعامبارىمىز (س.ع.س.)  دارەت العاندا، عۇسىل قۇيىنعاندا قانشا مولشەردە سۋ جۇمساعانى جايىندا مىناداي ٴبىر حاديس ريۋايات ەتىلگەن.

كان صلى الله عليه وسلم يتوضأ بالمُدّويغتسل بالصاع إلى خمسة أمداد

ٴاناس يبن مالىكتەن جەتكەن حاديستە: «پايعامبارىمىز (س.ع.س.) دارەتتى «مۋد» مولشەرىمەن الۋشى ەدى، عۇسىلدى «ساع» مولشەرىمەن بەس «مۋد» مولشەرىنە دەيىن قۇيىنۋشى ەدى» - دەلىنگەن[1].

      حاديستەگى «مۋد» جانە «ساع» سوزدەرى پايعامبارىمىزدىڭ (س.ع.س.) زامانىندا بەلگىلى ٴبىر ولشەمدى بىلدىرەتىن ىدىستارعا قولدانعان. «مۋد» حانافي عالىمدارىڭ پىكىرىنشە ەكى روتل ولشەمىنە تەڭ[2]. قازىرگى تىلمەن ايتقاندا «مۋد» 1 ليتر كولەمىندە بولسا، «ساع» ٴتورت مۋدتان تۇرادى. ياعني، ٴتورت ليتر شاماسىندا. دەمەك پايعامبارىمىز (س.ع.س.) 1 ليتر سۋمەن دارەت السا، 4 ليتر سۋمەن عۇسىل العان.

پايعامبارىمىزدىڭ (س.ع.س.) بۇل تاعىلىمى بىزدەرگە عۇسىل-دارەت العاندا  ىسىراپشىلدىققا جول بەرمەۋ كەرەكتىگىن ۇقتىرادى. بىردە پايعامبارىمىز (س.ع.س.) ساعد اتتى ساحاباسىنىڭ سۋدى مولشەردەن تىس قولدانىپ، دارەت الىپ جاتقانىن كورىپ: «ۋا، ساعد! بۇل نەتكەن ىسىراپ؟!» - دەدى. سوندا ساعد (ر.ا.):  «ۋا، اللانىڭ ەلشىسى دارەتتە دە ىسىراپ بولاما؟» دەگەندە پايعامبارىمىز (س.ع.س.): «ٴيا، ٴتىپتى اعىپ جاتقان وزەننەن دارەت الساڭ دا ىسراپ قىلما» – دەدى[3].

ٴبىرىنشى حاديستەگى ايتىلعان سۋ كولەمى دارەت پەن عۇسىل سۋىنىڭ مولشەرىنىڭ ەڭ ازىن بىلدىرەدى. بۇدان از بولعان جاعدايدا دارەتپەن عۇسىلدى سۇننەت بويىنشا تولىقتىرىپ الۋعا جەتكىلىكسىز بولادى. اتالعان مولشەردەن ارتىقتاۋ قولدانسا ەش ابەستىگى جوق. بويداعى كىردى كەتىرۋ ٴۇشىن سابىن قولدانعان جاعدايدا سابىن كەتكەنشە سۋدى پايدالانۋ - اتالعان مولشەردەن اسىپ كەتسەدە ىسىراپقا جاتپايدى. ٴبىراق تا تەك عۇسىل قۇيىنۋ ماقساتىندا دۋشتىڭ استىندا كوپ تۇرىپ، سۋدى ىسىراپ جاساۋعا بولمايدى.


[1] ساحيح بۋحاري، دارەت كىتابى.

[2] حاشياتۋ يبن ابيدين، 1-توم، 324-بەت

[3] احماد، يبن ٴماجا

date10.03.2017readCount6887categoryفيقھprintباسىپ شىعارۋ