عالامتور ويىندارىن ويناۋعا بولا ما؟
اسسالاماعالەيكۋم! سىزدەرگە قويار سۇراعىم ۆيرتۋالدى الەم تۋرالى بولماق. قازىرگى كەزدە ۆيدەو ويىندار قارىشتاپ دامۋدا. مەندە سولاردىن ىشىندەگى iron force (سمارتفوندارعا ارنالعان تانك ويىنى) دەپ اتالاتىن ويىندى ويناپ كەلە جاتقانىما 1 جىلدان استى. بۇل ويىننان شىققىم كەلەدى. ٴبىراق ويىن اككاۋنتىم 100 مىڭ تەڭگە شاماسىندا تۇرادى. سول سەبەپتى جاي شىعا سالۋ وڭاي ەمەس. ال جالپى باسقادا اككاۋنتتار تانككە بايلانىستى 0$-2500$ شاماسىندا. سۇراق: ەگەر مەن وسى اككاۋنتتى ساتسام جانە تۇسكەن قاراجات ماعان حالال بولا ما نەمەسە حارام با؟ ەگەر حارام بولا تۋرا ساتسام ماعان كەلەتىن زاردابى قانداي بولماق؟ قوسا كەتەتىن ٴجايت ويىننىڭ ىشىنە ەشقانداي اقشا سالىنباعان، تازا (مىسالعا، بۋكمەكەرلىك ويىننان ۇتىپ الىنعان اقشا دەگەن سياقتى. ونداي ويىنداردان اۋلاقپىن). مەنىڭ قالاۋىم وسى ويىندى جوعارى دەڭگەيگە جەتكىزىپ، ساتىپ قۇتىلىپ، كەرەكتى زاتتاردى ساتىپ العىم كەلەدى. الدىنا الا راحمەت))). نۇرسۇلتان

ۋاعالەيكۋماسسالام. يسلام شاريعاتى ادام بالاسىنىڭ جالپى جاسايتىن امالدارىن سارالاپ، پايدالى جانە پايداسىز دەپ ەكىگە ٴبولىپ قاراستىرادى. پايدالى نە پايداسىز امالدار ٴوز ىشىندە جەكەگە نەمەسە جالپىعا قاتىستى بولىپ بولىنەدى. امالداردىڭ پايدالى نەمەسە پايداسىز، زيان ەكەنىن اللا تاعالانىڭ شاريعاتى نەمەسە پاراساتتى اقىلمەن بەلگىلەنەدى. ياعني اركىم ٴوزى جەكە دارا ويىمەن بويىنداعى قالىپتاسقان ناپسىسىمەن شەشىم قابىلداۋى دۇرىس ەمەس. اللا تاعالا قاسيەتتى قۇراندا: «بالكىم سەندەردىڭ ۇناتپاعان نارسەلەرىڭ جاقسى بولۋى مۇمكىن، بالكىم سەندەردىڭ ۇناتقان نارسەلەرىڭ  جامان بولۋى مۇمكىن، سەندەر بىلمەيسىڭدەر، اللا تاعالا بىلەدى» - دەيدى («باقارا» سۇرەسى، 216-ايات). اللا تاعالا ادامزات بالاسىنا جاقسى مەن جاماندى قاتار جاراتۋى - سىناق ٴۇشىن ەكەندىگىن بىلەمىز. بۇل دەگەنىمىز مۇسىلمان قانداي دا ٴبىر امال جاساۋدا اقپەن قاراسىن اجىراتىپ بارىپ كىرىسۋى كەرەك بولادى. دىنىمىزدە ادام بالاسى ٴبىر ۋاقىت بويىن سەرگىتۋى ٴۇشىن مۋباح[1] امالدارمەن اينالىسۋىندا ەشبىر ابەستىك جوق. سول سەبەپتى پايعامبارىمىز (س.ع.س.) كەيبىر ويىندارعا رۇقسات بەرگەن بالكي قىزىقتىرعان دەسەك تە بولادى. سول جايلى حاديستەرىنىڭ بىرىندە پايعامبارىمىز (س.ع.س): «مۇسىلمان كىسىنىڭ ويناپ وتكىزگەن نارسەلەرىنىڭ ٴبارى بەكەر، تەك قانا ساداعىمەن وق اتۋى، اتىن  ۇيرەتۋى،  وتباسىمەن كوڭىل كوتەرۋى» - دەدى (تيرميزي، احماد). حاديستەن ادام بالاسىنا پايدا بەرمەيتىن تەك اقشاسى مەن ۋاقىتىنا ىسىراپ كەلتىرەتىن ويىنداردىڭ ٴبارى بەكەر ەكەنىن تۇسىنەمىز. الايدا بەلگىلى ٴبىر پايداسى بار سپورتتىق ويىنداردى ويناۋ رۇقسات ەتىلەدى. تەك قانا شاريعات تالاپتارىنىڭ شەڭبەرىنەن شىعىپ كەتپەسە بولعانى. اتاپ ايتار بولساق:

1) شاريعات تالاپ ەتكەن  اللا  تاعالانىڭ  اقىسىنا  قاتىستى  (پارىز، ٴ ۋاجىپ امالدار ناماز، ورازا ساداقا بەرۋ سياقتى)، ادامدارعا قاتىستى  اقىسىنان (رىزىق تابۋ، اتا-اناعا قىمزەت جاساۋ سياقتى) امالداردان توسىپ قالماۋى كەرەك.

2) ۋاقىتپەن  مال-دۇنيەگە ىسىراپ كەلتىرمەۋى شارت بولادى.

3) اقشا تىگىلىپ وينالماۋى كەرەك. اقشا تىگىلسە قۇمار ويىنعا كىرەدى. ول شاريعاتىمىزدا ۇلكەن كۇنا قاتارىنا جاتاتىنى بەلگىلى.

ال ەندى نەگىزگى  سۇراقتىڭ جاۋابىنا كەلەر بولساق iron force ويىنىن iron-force.ru سايتىنان قاراپ، ەش ٴبىر پايداسى جوق، كەرىسىنشە تەك ۋاقىت وتكىزەتىن، بوس اقشا تولەيتىن ويىن ٴتۇرى ەكەنىن اڭعاردىق. ٴتىپتى قۇمار ويىن دەپ ايتساق تا جاعىمىز جاڭىلىسپاس. ويتكەنى ٴسىز اقشا سالدىڭىز. سالعان اقشاڭىز سەبەپتى ول ويىننان شىعا سالۋ قيىن دەيسىز. دەمەك، قۇمارتتىڭىز. ٴبىر ويىنعا قۇمارتۋ اللانىڭ الدىندا ۇلكەن كۇنا ەكەنىن ۇعىڭىز. زاردابىنان قورقىڭىز. سىزگە ايتارىمىز سالعان اقشاڭىزدى سول ويىن يەلەرىنەن قايتارىپ الۋ مۇمكىندىگى بولسا، قايتارىپ الىڭىز. ول ويىن اككاۋنتىن باسقاعا ساتۋ سىزگە ادال اقشا بولمايدى. سەبەبى شاريعاتتىڭ تۇسىنىگىندە قۇنى بار پايدالى زات ەمەس. كەتكەن اقشاڭىز كەتسىن. پايدالى  نارسەلەرمەن اينالىسقانىڭىزدى ٴجون دەپ ٴبىلىڭىز. ويتكەنى بارشامىز اللانىڭ الدىندا ٴار ۋاقىتىمىز ٴۇشىن، ٴاربىر بىزدەرگە بەرىلگەن دۇنيەمىز ٴۇشىن سۇرالامىز.

ەسكەرەتىن ٴبىر ماسەلە بار. مەن بۇل ويىندى ويناپ اسكەري قابىلەتىمدى ارتتىرام دەگەندەردىڭ دە ٴۋاجى شىندىققا جاناسپايدى. سەبەبى شىنايى ەمەس. تەك قانا ويىن. اسكەري تاجىربەسىن ارتتىرامىن دەگەن ادام شىنايى اسكەرگە بارىپ شىڭدالۋ كەرەك ەكەنىن ايتقىمىز كەلەدى. اللا تاعالا بارشامىزدان ارتىق بىلەدى.


[1] مۋباح امال دەگەنىمىز – ونى ىستەۋدە ەشبىر ساۋاپ تا، كۇنا دا جوق امالدار.

date02.03.2017readCount4142categoryٴارتۇرلىprintباسىپ شىعارۋ