«مۇحاممەد (س.ع.س.) – اللانىڭ ەلشىسى» ٴفيلمىن كورۋگە بولا ما؟
اسسالاۋماعالەيكۋم! يراندىق رەجيسسەر مادجيد ٴمادجيديدىڭ تۇسىرگەن «مۇحاممەد (س.ع.س.) – اللانىڭ ەلشىسى» ٴفيلمىن كورۋگە بولا ما؟ 

ۋا الاەيكۋم اسسالام!

قازىرگى تاڭدا پايعامبارلار ٴومىرى جانە يسلام تاريحى جايلى فيلمدەر كوپتەپ تۇسىرىلۋدە. تاياۋدا عانا رەسەي ەلىندە كورسەتىلە باستاعان «مۇحاممەد (س.ع.س.) – اللانىڭ ەلشىسى» اتتى فيلم جايىندا كوپتەگەن داۋ-داماي تۋىنداپ جاتقانى بەلگىلى.

وسى رەتتە پايعامبارلاردىڭ ونىڭ ىشىندە ارداقتى پايعامبارىمىز مۇحاممەدتىڭ (س.ع.س.) ٴرولىن سومداۋعا قاتىستى يسلام شاريعاتىنىڭ كوزقاراسىنا توقتالۋدى ٴجون كوردىك. اللا تاعالا پايعامبارلاردى بۇكىل الەمنەن ارتىق ەتىپ، دارەجەلەرىن كوتەرىپ قويدى.

ول جونىندە اللا تاعالا قۇراندا بىلاي دەيدى: «ٴھام بۇل – قاۋىمىنا قارسى يبراھيمگە بەرگەن بۇلتارتپاس ايعاعىمىز. ٴبىز قالاعانىمىزدىڭ دارەجەلەرىن كوتەرەمىز. اقيقاتىندا، راببىڭ – دانا ٴھام ٴبىلۋشى! جانە وعان [يبراھيمگە] ىسقاق پەن جاقىپتى سىيلادى; بارلىعىن دا تۋرا جولعا سالدىق. ٴھام ودان بۇرىن نۇحتى دا تۋرا جولعا سالدىق جانە ونىڭ ۇرپاعىنان ٴداۋىت، سۇلەيمەن، اييۋب، ٴجۇسىپ، مۇسا، ھارۋنداردى دا (تۋرا جولعا سالدىق). ٴھام مۇحسيندەردى دە سولاي سىيلايمىز! سونداي-اق زاكاريا، جاقيا، يسا، ٴىلياستى دا (تۋرا جولعا سالدىق)، – ٴبارى دە ىزگىلەردەن ەدى. ٴھام يسمايل، ٴال-ياساع، ٴجۇنىس، لۇتتى دا (تۋرا جولعا سالدىق)، – ٴبارىن دە الەمدەرگە ارداقتى ەتتىك»[1].

مۇنداعى «ٴبارىن دە الەمدەرگە ارداقتى ەتتىك» دەگەن ايات پايعامبارلاردىڭ باسقا جاراتىلىستان ارداقتى ەكەندىگىن بىلدىرەدى. ال، مۇحاممەد (س.ع.س.) – ول پايعامبارلاردىڭ ەڭ ابزالى. ول جونىندە اللا ەلشىسى (س.ع.س.) ٴبىر حاديسىندە: «مەن ادام ۇرپاعىنىڭ مىرزاسىمىن...»[2]، – دەگەن. ەندەشە، وسىنداي ارتىقشىلىققا يە بۇكىل پايعامبارلاردى قۇرمەتتەۋ – بارشا ٴمۇمىننىڭ مىندەتى. كىمدە-كىم ولارعا زيان جەتكىزسە ەكى دۇنيەدە دە قاسىرەتكە ۇشىرايدى. اللا تاعالا قۇراندا ول جايلى بىلاي دەيدى: «اسىلىندا، اللانى جانە ونىڭ ەلشىسىن رەنجىتكەندەرگە [اللاعا سەرىك قوسىپ، پايعامباردى قۇرمەتتەمەگەندەرگە] اللا دۇنيەدە دە، اقىرەتتە دە لاعنەت ايتتى ٴارى ولارعا قورلاۋشى ازاپ [توزاق] دايىندادى»[3].

پايعامبارلاردىڭ (س.ع.س.) ٴرولىن سومداۋ ولارعا زيان كەلتىرۋ بولىپ تابىلادى. ويتكەنى، بۇل ٴىستىڭ سالدارىنان ولارعا جالعان كەيىپ (وبراز) تاڭىلىپ، ولاردىڭ اتىنان وتىرىك سويلەۋگە ەسىك اشىلادى. پايعامبارلاردىڭ ٴرولىن ويناعان ادام ىسىمەن دە سوزىمەن دە ولاردىڭ شىنايى تۇلعاسىنىڭ سيقىن بۇزىپ، كەمسىتكەن بولادى. سەبەبى، پايعامباردىڭ ٴرولىن ويناپ جاتقان اكتەرلەر قانشاما شەبەر بولسا دا پايعامبارلاردىڭ شىنايى كەيپىن، مىنەزىن، ٴتۇر-تۇلعاسىن سالا المايدى. ونى كورگەن ادامنىڭ ويىنا سول اكتەردىڭ شىندىققا جاناسپايتىن بەينەسى قالىپ قويادى. ٴتىپتى، اللا تاعالا پايعامبارلاردىڭ بەينەسىنە شايتان كىرە المايتىنداي قورعاپ قويعان.

پايعامبارىمىز (س.ع.س.) ٴوزىنىڭ ٴبىر حاديسىندە: «راسىندا، شايتان مەنىڭ بەينەمە كىرە المايدى»،[4] – دەگەن. مىنە، وسى ايتىلعان دايەكتەردى نەگىزگە الا وتىرىپ، عالىمداردىڭ بارشاسى ٴبىراۋىزدان پايعامبارلاردىڭ ٴرولىن سومداۋعا حارام دەپ ۇكىم بەرگەن. ال، يراندىق رەجيسسەر مادجيد ٴمادجيديدىڭ تۇسىرگەن «مۇحاممەد (س.ع.س.) – اللانىڭ ەلشىسى» فيلمىنە ٴبىرقاتار مۇسىلمان ەلدەرى تىيىم سالعان.   

سونىمەن قاتار، مىسىر ەلىنىڭ ٴپاتۋا كوميتەتى ٴارى ٴال-ازھار عالىمدارى ٴتۇسىرىلۋى بارىسىندا-اق بۇل فيلمگە قارسى پىكىرىن ٴبىلدىرىپ، ول ٴىستىڭ حارام ەكەندىگىن مالىمدەگەن بولاتىن. مىسالى، ٴال-ازھار وكىلى دوكتور ابباس شاۋمان «پايعامبارلاردىڭ ٴرولىن ويناۋ – حارام، ونى شىعارعان ادامدار كۇناكار جانە ونى كورگەندەر سوعان سەرىك بولادى» دەسە، ٴاز-ازھار ٴاش-شاريفتىڭ ٴپاتۋا كوميتەتىنىڭ باس حاتشىسى دوكتور سايد امير وسى كينوعا جۇمسالعان قاراجاتتى دا حارام دەپ، مۇسىلماندارعا ونى كورۋگە بولمايتىنىن ەسكەرتكەن[5].

دەمەك، مادجيد ٴمادجيديدىڭ رەجيسسەرلىعىمەن شىققان «مۇحاممەد (س.ع.س.) – اللا ەلشىسى» اتتى فيلمدە پايعامبارىمىزدىڭ (س.ع.س.) جاس كەزىندەگى كەيپى سومدالعاندىعىنا بايلانىستى ونى كورۋگە دە ونىمەن تابىس تابۋعا دا بولمايدى. اللا تاعالا قۇراندا بىلاي دەيدى:  «كۇناعا جانە دۇشپاندىققا جاردەمدەسپەڭدەر. اللادان قورقىڭدار! كۇدىكسىز اللانىڭ ازابى قاتتى»[6].  

قمدب شاريعات جانە ٴپاتۋا ٴبولىمى 

[1] «انعام» سۇرەسى، 83-86 اياتتار.
[2] ٴابۋ ٴداۋىت ريۋاياتى
[3] «احزاپ» سۇرەسى، 57-ايات.
[4] بۇحاري، ٴمۇسلىم ريۋايات ەتكەن
[5] http://www.ahram.org.eg/newsprint/250848.aspx
[6] «مايدا» سۇرەسى، 2-ايات.

date25.11.2016readCount5577categoryٴارتۇرلىprintباسىپ شىعارۋ