ەرلى-زايىپتىلار جاماعات بوپ ناماز وقي الا ما؟
اسسالامۋ الەيكۋم! مەن ايەلىممەن بىرگە جاماعات بوپ ناماز وقي الامىن با؟ ەر كىسىنىڭ ايەلمەن ناماز وقۋى دۇرىس پا؟ دۇرىس بولعان كۇندە دە جاماعاتقا ەسەپتەلە مە؟

ۋا الەيكۋم اسسالام!

حانافي ٴمازھابى بويىنشا، نامازدى جاماعات بولىپ وقۋ ٴۇشىن كەم دەگەندە ەكى ادام – يمام جانە ۇيۋشى بولۋى شارت. ال، ەكەۋىنىڭ دە ەر ادام بولۋى شارت رەتىندە كورسەتىلمەگەن. سوندىقتان، ايەلىمەن وقىلعان ناماز جاماعاتپەن وقىلعانعا ەسەپتەلەدى.

يمام كاساني: «جاماعات بولۋ ماسەلەسىنە كەلسەك، جاماعات ەڭ كەمى ەكى كىسىدەن قۇرالادى. بۇل – يماممەن قوسا تاعى ٴبىر ادامنىڭ بولۋى. پايعامبارىمىز (س.ع.س.): «ەكى ادام جانە ودان كوپ بولۋى – جاماعات»، – دەپ ايتقان. ويتكەنى، جاماعات – جينالۋ سوزىنەن الىنعان. ال، ەكى ادامنىڭ بىرگە بولۋى وسى ماعىنانى بىلدىرەدى. ەكەۋىنىڭ ٴبىرى ەر ادام، ايەل نەمەسە جاس بالا بولۋىندا ايىرماشىلىق جوق. ويتكەنى، پايعامبارىمىز (س.ع.س.) جالپى ەكى ادامنىڭ بىرىگۋىن جاماعات دەپ اتاپ تۇر»[1]، – دەيدى.

دەگەنمەن، ەرلى-زايىپتىلار جاماعات بوپ ناماز وقىعاندا مىنانى ەسكەرگەنى ٴجون. ايەلدىڭ اياقتارىنىڭ ۇشى ەر كىسىنىڭ وكشە تۇسىندا تۇرۋى ٴتيىس. ەرلى-زايىپتىلار ٴبىر قاتاردا تۇرسا، ناماز بۇزىلادى.

بۇل جونىندە يمام قازيحان: «ايەل ۇيىندە كۇيەۋىمەن بىرگە ناماز وقىعاندا ەكەۋىنىڭ اياقتارى ٴبىر قاتاردا بولسا، ەكەۋىنىڭ جاماعات بوپ وقىعان نامازى دۇرىس ەمەس. ايەلدىڭ اياعى كۇيەۋىنىڭ وكشە تۇسىندا تۇرسا، دۇرىس بولادى. ساجدە جاساعاندا ايەلدىڭ ۇزىن بويلى بولعاندىعى سەبەپتى كۇيەۋىنىڭ باسىمەن دەڭگەيلەس كەلسە، ناماز بۇزىلمايدى. ويتكەنى، ەسكەرىلەتىن جانە ٴمان بەرىلەتىن دەنە مۇشەسى – باسى ەمەس، اياق...»،[2] – دەيدى.

دەمەك، ەر كىسى ايەلىمەن جانە باسقا دا ماحرام ايەلدەرمەن ناماز وقۋى جاماعات ەسەبىنە كىرەدى.



[1] كاساني، باداي ساناي، 1/156
[2] حاشيات يبن ابيدين، 1/752

رۋسلان كامباروۆ
date23.11.2016readCount9487categoryنامازprintباسىپ شىعارۋ