قۇراننىڭ اۋديوسىنان ساجدە اياتىن ەستىگەندە «ٴتيلاۋات ساجدەسىن» جاساۋ شارت پا؟
اسسالامۋعالەيكۋم! ۇيالى تەلەفون ارقىلى وقىلعان قۇرانداعى ساجدە اياتتارىن ەستىگەن ادامعا دا "ٴتيلاۋات ساجدەسىن" جاساۋ كەرەك پە؟

ۋاعالەيكۋماسسالام ٴۋا راحماتۋللاھي ٴۋا باراكاتۋھ!

ەرتەرەكتە جازىلعان حانافي فيقھ كىتاپتارىندا: "ساجدە اياتى وقىلعاندا، وقىعان ادامنىڭ ٴوزىن ەمەس داۋسىنىڭ جاڭعىرىعىن ەستىگەن جاعدايدا «ٴتيلاۋات ساجدەسىن» جاساۋ شارت ەمەس" دەلىنگەن [1].  

ولاي بولسا، قۇراننىڭ اۋديو جانە ۆيدەو نۇسقاسى قۇران وقۋشىنىڭ تەك داۋسىنىڭ كوشىرمەسى بولعاندىقتان، اۋديو نە ۆيدەو ارقىلى ساجدە اياتىن ەستىگەن مۇسىلمانعا «ٴتيلاۋات ساجدەسىن» جاساۋ شارت ەمەس.  

سونداي-اق، اقىلى اۋىسقان جىندىنىڭ جانە سويلەپ ۇيرەنگەن توتىقۇستىڭ وقىعان ساجدە اياتىن ەستىگەن كىسىگە دە ساجدە جاساۋ ٴۋاجىپ ەمەس[2]. ويتكەنى، ساجدە جاساۋ ٴۋاجىپ دەۋىمىز ٴۇشىن اقىل-ەسى دۇرىس ٴتىرى ادام تاراپىنان وقىلعان  بولۋى ٴتيىس[3].


«ٴتيلاۋات ساجدەسى» دەگەن نە؟

قۇران كارىمدەگى ساجدە جاساۋعا بۇيىرعان اياتتاردىڭ ٴبىرىن وقۋدى «ٴتيلاۋات ساجدەسى» دەيمىز (ٴتيلاۋات - وقۋ دەگەندى بىلدىرەدى). ايتسە دە، ەلىمىزدەگى نامازحان قانداستارىمىزدىڭ اراسىندا "ٴتيلاۋات ساجدەسى" دەپ، كوبىنەسە ساجدە اياتىنان كەيىن جاسالاتىن ساجدەنى ايتادى. قۇران كارىمنىڭ ون ٴتورت جەرىندە ساجدە اياتى كەلگەن[4]. حانافي مازھابىندا وسى اياتتاردى وقىعان نە ەستىگەن ادامعا ٴبىر رەت ساجدە جاساۋ – ٴۋاجىپ. 


[1] ٴشۇرۋنبۇلالي: يمدات – 502 بەت.
[2] حاشياتۋ يبن عابيدين – 4/573 بەت.
[3] حاشياتۋ يبن عابيدين – 4/558 بەت.
[4] ساجدە اياتتارى: اعراف، 206; راعىد، 15; ناحىل، 50; يسرا، 109; ٴماريام، 25; حاج، 18; فۋرقان-60; ٴنامل، 25; ساجدە، 15; ساد، 24; ٴفۇسسيلات، 37; ٴناجم، 62; ينشيقاق، 20; الاق، 19.

ابدۋسامات قاسىم
date17.11.2016readCount3366categoryقۇلشىلىقprintباسىپ شىعارۋ