ورازانىڭ دارەجەلەرى بار ما؟
اسسالامۋ الەيكۋم! ورازا تۇتۋشى ادامداردىڭ بارلىعىنىڭ ساۋابى بىردەي مە الدە ايىرماشىلىق بولا ما؟ مۇنداي ساۋال قويۋىما «جامان ٴسوز بەن ارەكەتتەن تىيىلماعاننىڭ شولدەپ اش جۇرگەنى قۇدايعا كەرەك ەمەس» دەگەن ماعىناداعى حاديس تۇرتكى بولدى.  

ۋا الەيكۋم اسسالام!

ٴيا، ورازانىڭ دا قالاي ۇستالعانىنا بايلانىستى بىرنەشە دارەجەسى بار. مىسالى، كەي ادامدار تەك سۋسىن ىشۋدەن جانە تاماقتانۋدان عانا تىيىلادى. بۇل – ورازانىڭ ەڭ تومەنگى دارەجەسى. ال، ەكىنشى توپتاعى ادامدار – ىشىپ-جەۋدەن بولەك، جامان ارەكەت پەن جامان سوزدەن تيىلاتىندار. بۇل – اۋەلگىدەن جوعارىراق تۇراتىن دارەجە. ال، ەڭ جاقسىسى – اس پەن سۋدان، جاعىمسىز ىس-ارەكەت، جامان سوزدەردەن تىيىلۋمەن قاتار، جۇرەكتەرى قۇمارلىققا جانە ساناسى جامان ويعا جول بەرمەيتىندەر ورازاسى. بۇل – ورازانىڭ ەڭ جوعارى ساتىسى.

يمام عازالي دا ٴوز ەڭبەگىندە ورازانى وسى تارىزدەس ٴۇش دارەجەگە بولەدى:

1. جالپىنىڭ ورازاسى. قارىن مەن جىنىس مۇشەنى اس جانە قۇمارلىقتان تىيۋ;

2. ارنايىلاردىڭ ورازاسى. قۇلاق، كوز، ٴتىل، قول، اياق جانە باسقا دا مۇشەلەرىن كۇنادان تىيۋ;

3. ارنايىنىڭ ارنايىسى. ول – جۇرەكتى دۇنيە ۋايىمى مەن دۇنيەلىك تىرشىلىكتەن تىيۋ.  بىلايشا ايتقاندا، جۇرەكتى اللاعا زىكىر ەتۋدەن باسقا نارسەدەن تىيۋ.

 
رۋسلان كامباروۆ
date01.07.2015readCount5678categoryرامازانprintباسىپ شىعارۋ